François Isabel

Dr François Isabel, wo am 19. Juli 1859 z Vers-L’Eglise im Wadtland uf d Wält cho und am 31. Augschte 1936 z Antagnes gstorben isch, isch e Schwiizer Lehrer und Volchskuntler gsi.

Er het z Lausanne s Leereseminaar bsuecht und isch einedryssg Joor lang Lehrer z Villars-sur-Ollon i de Wadtländer Voralpe gsi. Me het em döört au eifach dr Régent Isabel gseit.

Er het verschidene Sache über d Gschicht und d Wirtschaft vo sym Doorff und vo andernen Oorten im Pays d’Enhaut gschribe. So het men en gäärn bin es paar Projäkt lo mitschaffen, öppe em Dictionnaire historique du canton de Vaud und em Livre d’or des familles vaudoises. Syni Bytreeg, es sind hunderti, sind i verschidene Zytschrifte abtrukt, au i dr Revue historique vaudoise. Er isch eine vo de Gründer vo dr Wadtländer Gschichts- und Archäologygselschaft Société vaudoise d’histoire et d’archéologie gsi.

Dr Isabel het sich für s Patois, die lokali Variante vo dr tradiziuonelle Wadtländer Sprooch, wo zum Arpitanische ghöört, inträssiert. Er isch e guete Wadtländer Informant für d Redakzioon vom Wälschschwiizer Mundartwörterbuech Glossaire des patois de la Suisse romande (GPSR) gsi. Notize vo iim het s Archyv vom Glossaire, und e Teil vo synere Dokumäntazioon isch hüt im Wadtländer Staatsarchiv, anders wyters no i privaate Händ.

es paar Wäärch vo iim

• Légendes du Pays-d’Enhaut vaudois. In: Schweizerisches Archiv für Volkskunde, 1913, S. 107-116.
• Vieux usages dans les Alpes d’Ollon. In: Schweizerisches Archiv für Volkskunde, 1912, S. 75-89.
• Proverbes des Alpes vaudoises, 1915
• Choses du passé local. In: Echo de la Montagne, 7. Mai 1915