Drei Tage im April

Filmdate
Originaltitel	Drei Tage im April
Produktionsland	Deitschland
Originalsprooch	Deitsch, Schwäbisch
Erschiinigsjoor	1995
Lengi	103 Minute
Altersfreigoob	FSK 12
Stab
Regie	Oliver Storz
Dräibuech	Oliver Storz
Produktion	Dietger Bangsberg Stefanie Gros
Muusig	Werner Fischoetter Markus Schmitt
Kamera	Hans Grimmelmann
Bsetzig
D Karoline Eichhorn als Anna Baisch D April Hailer als Irene D Eva Michel als Elli D Birke Bruck als Amalie Dr Dieter Eppler als Steigmaier Dr Walter Schultheiß als Eugen Klenck Dr Sepp Schauer als Hochmoser Dr Manfred Boehm als Pfarrer Sengle Dr Reinhold Ohngemach als Raab D Heidy Forster als Kätter Dr Felix Eitner als Rolf Dr Oscar Müller

Dialäkt: Schwäbisch

Drei Tage im April ischt a deitsch-eschtreichischer Fernsehfilm us-em Jôhr 1994 vom Regisseur Oliver Storz. Dr sell hôt au s Drehbuach zo deam Stroifa gschriiba. Des beruaht uff-ra wôhra Begebaheit. En dr Bundesrebublik Deitschland isch der Stroifa zom erschda Môl am 7. April 1995 uff-em Kuldurkanal ARTE ausgschdrahlt wôrra.

Handlong

Der Film schbiilt kurz vôr-em Ende vom Zwoida Weltkriag em fikdiva schwäbischa Dorf Nesselbühl. An Haufa Eiwohner wardet bloß druff, dass bald de amerikanische Trubba eimarschiiret. En dr Ferne heert mr noh d Panzer schiaßa. Dô kommet a baar SS-Stroifa en da Ort ond exekudiiret a baar Soldada, wo-se fir Deserteer haldet, weil-se sich ohne Marschbefehl em Dorfwirtshaus niiderglassa hend.

Nôch-ma Lokomodiv-Schada muaß d Reichsbôh en-ra Nacht drei Giiadrwäga ond oin Persona-Waggoo vo-ma SS-Sondrzuag abkubbla ond em Bôhhof standa lau. Am Dag druff stellet dia Dorfbewohner fescht, was fir a Ladong en selle Wäga dren ischt: Lauder Häftleng vo-ma Konzentrationslager. Dia stoßet Schroi aus, weil se am vrhongra ond vrdurschda send; abr näamert vom Ort getraut sich, deane arme Kreadura zo helfa. Der Vorfall macht bei etliche Dorfbewohner dia negadive Seida vom nazionalsozialischdischa Reschiim deitlich.

D Fihrongsriige vom Dorf woiß sich et z helfet ond druckt sich om a Entscheidong rom: Wia’s-en eidrichdet wôrra ischt, vrweiset dr Birgermoischter, dr Ortsbaurafihrer, dr Ortsgrubbaleiter ond dr Bôhhof-Vorstand uff ihre ibrgeordnede Inschdanza. D Mehrheit vo de Eiwohner will mit selle Häftleng nix zo dua han ond dädet-se am gernschda glei wiidr vrschwenda säha. Bloß bei dr zwanzgjähriga Anna, em Dechterle vom Baurafihrer, d BdM-Fihrerin vom Flegga ond a glihenda Vrehrere vom Adolf Hitler, regt sich s Gwissa. Dui geit deane eipferchde Leit em Zug ebbes zom Essa ond zom Drenka. Am dridda Tag send uff oimôl dia SS-Soldada vrschwonda.

Uffheera duat der Film dô drmit, dass a baar Dorfbewohner dia Wäga mit deane KZ-Häftleng en d Nôchbrgmoid nomschiabat. Was deet mit deane Leit bassiirt, erfehrt mr et. Der offene Schluss wuud durch-an wallenda Neabl dargschdellt.

Was sonscht noh zo erwehna ischt

Scho fenf Jôhr, bevôr der Film entstanda ischt, hôt dr Oliver Storz fir d Wirdabergischa Landesbihne Esslenga s Theaterstick „Die barmherzigen Leut von Martinsried. Ein Heimatstück“ gschriiba, wo da gleicha Stoff behandlet wia „Drei Tage im April“.

Obwohl dui Handlong vo deam Film em Schwôbaland schbiilt, isch der Stroifa et em Schwäbischa dreht wôrra, sondern en dr Stadt Sömerda ond en dr Gmoid Hardisleben, boide em deitscha Bundesland Thirenga. Als Schauplatz fir da Bôhhof hôt dr sell vo Griefstedt herhalda miaßa, wo em gleicha Bundesland a bissle außerhalb vo dr Ortschaft leit. Bemerkenswert ischt au, dass en deam Film zemlich viil Schwäbisch gschwätzt wuud. Dô zeigt sich, dass mr da Dialekt et bloß zo luschdige Sacha vrwenda kô, sondern au – ond des kommt en dr Praxis selda vor – om a ernschthafda Handlong zo schildra.

Kridika

• S Lexikon des internationalen Films fasst sei Urteil so zamma, dass der Film a sorfäldig inszeniirda Parabl mit zom Doil hervorragende schauschbiilerische Leischdonga ischt, au wenn’r a baar strukdurelle Schwecha hedd.

• Zelluloid.de schreibt, dr Regisseur Oliver Storz dät en deam Film a erschitterndes Bild von-ra Generazioo schildra, wo nôch zwelf Jôhr Nazi-Zeit durch Passivideet, an vorauseilenda Gehorsam ond Vrblendong prägt wär.

Auszoichnonga

• Bei dr Vorgabe vom Boirischer Filmpreis ischt Drei Tage im April mit-em Schbezialpreis Beste Kamera fir da Hans Grimmelmann auszoichnet wôrra.
• Wo’s om d Vorgabe vom Deutschen Kamerapreis ganga ischt, isch dr Hans Grimmelmann fir sei Bildgeschdaldong lobend erwehnt wôrra.
• Au mit-em renommiirda Grimme Preis kô sich der Film schmicka.
• Bei dr Vorgabe vom Prix Europa hôt „Drei Tage im April“ da Schbezialpreis kriagt.
• Beim FilmKunstFest Schwerin hôt „Drei Tage im April“ da Erschda Preis kriagt, wo vo dr Bundeszentrale für politische Bildung vrgeaba wuud.
• Dr Regisseur ond Drehbuach-Autor Oliver Storz ischt fir sei Gesamtwerk mit-em Hans-Bausch-Media-Preis auszoichnet wôrra.
• Seller Môô hôt drzua noh da Telestar vrliha kriagt.
• Vo dr DAG hôt „Drei Tage im April“ da Fernsehpreis in Gold kriagt.

Weblink

• Drei Tage im April in dr Internet Movie Database
• A Beschreibong vo deam Film bei filmportal.de

Oinzlne Nôchweis

Dä Artikel basiert uff ere fräie Übersetzig vu dere Version vum Artikel „Drei_Tage_im_April“ vu de dütsche Wikipedia. E Liste vu de Autore un Versione isch do z finde.