Delphine Klopfenstein Broggini

d Delphine Klopfenstein Broggini (2019)

D Delphine Klopfenstein Broggini (* 9. Juni 1976 z Bärn; haimetberächtigt z Losone un z Adelbode) isch e Schwyzer Bolitikeri (Grieni).

Uusbildig un Beruef

D Delphine Klopfenstein Broggini isch z Bärn, z Nöieburg un z Gämf ufgwagse. Si het d Matura am Saussure College z Grand-Lancy gmacht. An dr Universiteet Gämf het si Soziology, Geografy, Bolitikwisseschafte un Romaanischi Sprooch un Kultuur studiert.

Ab 2003 het si as Koordinatoori vum Verain Pro Vélo Genève gschafft un isch speeter Mitgrinderi vu dr Zytig Pro Vélo Info gsii. 2011 isch si as Kommunikazioonsmänätscheri zum Sekretariaat vu Geneva Vert gwägslet. Vu 2013 bis 2019 isch si Co-Generaalsekreteeri vu dr Griene im Kantoons Gämf gsii. Si isch ghyroote un het zwai Chinder. Si läbt mit ire Familie z Versoix.

Bolitik

D Delphine Klopfenstein Broggini isch syter 2015 Mitgliid vum Grooße Root vum Kantoon Gämf. Ab 2013 isch si scho stellverdrättend Mitgliid gsii. Im Grooße Root isch s Mitgliid vu dr Kiumission fir Gmains-, Regioons- un Staatsaagläägehaite. D Klopfenstein Broggini isch derzue au Delegierti vum Grooße Root in dr Mobiliteetskummissioon vum schwyzerisch-franzeesische Root vu dr Regioon Léman.

Bi dr Barlemäntswaale am 20. Oktoober 2019 isch d Delphine Klopfenstein Broggini fir di Griene in Nazionaalroot gweelt woore.

D Klopfenstein Broggini isch Voorstandsmitgliid vu dr Griene Schwyz, dr Berootigsstell fir Fraue un Familie F-Information z Gämf un vu Pro Natura Gämf.

Weblink

• Websyte vu dr Delphine Klopfenstein Broggini
• Delphine Klopfenstein Broggini uf dr Websyte vo dr Bundesversammlig
• d Delphine Klopfenstein Broggini uf dr Websyte vum Grooße Root vum Kantoon Gämf
• Interässebindige vu dr Delphine Klopfenstein Broggini uf lobbywatch.ch