Camille Pissarro

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Sälbstbordret, 1873

Dr Jacob Abraham Camille Pissarro (* 10. Juli 1830 z Charlotte Amalie, Dänisch Westindie hüte: Amerikanischi Jumpfereinsle; † 12. Novämber 1903 z Bariis) isch äine vo de bedütendste und broduktivste Mooler vom Impressionismus gsi.

Lääbe[ändere | Quälltäxt bearbeite]

Zwäi schwätzendi Fraue am Meer, 1856
L'Hermitage à Pontoise, 1867
D Strooss vo Louveciennes, 1872
D Iisebaanbrugg bi Pontoise, 1873
E Holzfeller, 1878
Place du Havre, 1893

Dr Pissarro stammt us ere marranische Familie us Bordugal. Si Vater isch as Chind mit siner Familie vor dr Inkwisizioon uf Bordeaux gflüchdet. 1824 isch d Familie in d Antilleninsle usgwanderet. Won er zwölfi gsi isch, häi d Eltere dr Camille Pissarro in en Internat im ene Vorort vo Bariis gschickt. 1847 isch er zrugg uf Westindie, er het s aber vorzooge, z moole anstatt s Gschäft vo dr Familie kennezleere. Im Haafe isch er em dänischen Mooler Frederik Siegfried George (Fritz) Melbye begeegnet, wo sich scho e Naame as Mooler gmacht het. 1852 isch er mit em Melbye uf Venezuela gange. Sim Vater het das nid gfalle, er het en aber schliesslig lo mache.

Z Bariis[ändere | Quälltäxt bearbeite]

1855 isch dr Pissaro uf Bariis gange, won er uf dr Wältustellig Bilder vom Eugène Delacroix, Jean-Auguste-Dominique Ingres, Camille Corot und andere het chönne bewundere. Er het bim Corot afo leere und het in de Wälder im Norde vo Bariis afo moole. 1857 si sini Eltere zrugg uf Frankriich cho und dr Pissarro mit ene z Montmorency gläbt. Mit em Dienstmäitli Julie Valley het er e Verheltnis gha und ere zwäi Chinder gmacht. 1859 isch er an dr Académie Suisse, ere freie Moolschuel, em Claude Monet und em Paul Cézanne begeegnet.

In de 1860er Joor het dr Pissarro si äignig Stiil afo finde und het im Salon des Refusés Gmäld afo ustelle, wo vo de Kritiker globt worde si, aber Gäld het er drmit nid verdient und het müesse Markise aamoole, zum Gäld verdiene. 1869 und 1870 het er äng mit sine Fründ Claude Monet und Pierre-Auguste Renoir zämmegschafft.

Z Ängland[ändere | Quälltäxt bearbeite]

Wägen em dütsch-franzöösische Chrieg isch er im Novämber 1870 uff London gange, won er dr MOnet wider droffe het, wo au vor em Chrieg gflüchdet isch.

Am 14. Juni 1871 het er z Croydon d Julie Vellay ghürootet und isch im gliiche Monet uf Frankriich zrugg.

Zrugg z Frankriich[ändere | Quälltäxt bearbeite]

Er het bsundrigs intensiv mit em Paul Cézanne afo zämmeschaffe und si häi sich geegesitig stark beiiflusst. 1874 het er mit andere zämme die ersti Impressioniste-Usstellig organisiert. Finanziell isch er die ganzi Zit in schlächtem Zuestand gsi und het kuum gnueg verdient zum Überlääbe.

Avenue de l'Opera, 1898
Höijete bi Éragny, 1903

In dr Middi vo de 1880er Joor het er die junge Künstler Paul Signac und Georges Seurat kennegleert. Er het sich für d Farbeleer intressiert und wie die pointillistisch afo moole. Er het das aber wider ufgee und afo moole wie früener.

Dr spooti Erfolg[ändere | Quälltäxt bearbeite]

1892 isch em ändlig dr Durchbruch glunge mit ere groosse Retrospektive bi sim Förderer, em Kunsthändler Durand-Ruel. In de letschte zää Joor vo sim Lääbe het er e Serii vo Stadtbilder us Rouen, Dieppe und Bariis gmoolt. Won er 1903 gstorbe isch, het er e riisigi Zaal vo Bilder hinderloo.

E baar vo sine Wärk[ändere | Quälltäxt bearbeite]

  • Zwäi schwätzendi Fraue am Meer, St. Thomas, 1856, National Gallery of Art, Washington, D.C.
  • E Blatz z La Roche-Guyon, 1867, Nazionalgalerii Berlin
  • Ussicht vo Louveciennes us, 1869–1870, National Gallery, London
  • E Strooss z Sydenham, 1871, National Gallery, London
  • Bordret vom Paul Cézanne, 1874, National Gallery, London
  • Jeanne-Rachel Pissarro, 1873–1874, Ashmolean Museum, Oxford
  • Madame Pissarro am Fänster, 1873–1874, Ashmolean Museum, Oxford
  • Boot z Pointoise, 1876, Metropolitan Museum of Arts, New York
  • Wöschfrau, 1880, Metropolitan Museum of Arts, New York
  • S chliine Dienstmäitli vom Land, 1882, National Gallery, London
  • Dampfschiff z Rouen, 1896, Metropolitan Museum of Arts, New York
  • Dr Boulevard Montmartre am ene Wintermorge, 1897, Metropolitan Museum of Arts, New York
  • Dr Boulevard Montmartre z Nacht, 1897, National Gallery, London
  • D Tuilerie am ene Winternomiddaag, 1899, Metropolitan Museum of Arts, New York
  • Dr Gärtner, 1899, Staatsgalerie Stuttgart
  • Dr Louvre under Schnee, 1902, National Gallery, London
  • Le Quai Malaquais et l'Institut, 1903

Liddratuur[ändere | Quälltäxt bearbeite]

  • Joachim Pissarro: Camille Pissarro. Hirmer, 1993, ISBN 3775708553
  • Christoph Becker, Wolf Eiermann: Camille Pissarro. Hatje Cantz, 1999, ISBN 3775708553
  • Christopher Llyod: Pissarro. (Colour Library), Phaidon, ISBN 0714827290
  • Richard Thomson: Camille Pissarro - Impressionism, landscape and rural labour. Ausstellungskatalog, Amsterdam Books, 1990, ISBN 0941533905
  • Richard R. Brettell: Pissarro and Pontoise – the painter in a landscape. Yale Univ. Press, 1990, ISBN 0300043368
  • Richard R. Brettell: Pissarro's people. Prestel, 2011, ISBN 3791351184.
  • Katharina Rothkopf: Pissarro – creating the impressionist landscape. Philip Wilson, 2007, ISBN 0856676306
  • Karen Levitov, Richard Shiff: Camille Pissarro: Impressions of City & Country". Yale Univ. Press, 2007, ISBN 0300124791
  • Bruce Bernard (Hrsg.): Die großen Impressionisten. Revolution in der Malerei. Delphin-Verlag, München 1987, ISBN 3-7735-5323-4
  • Raymond Cogniat: Pissarro. Südwest-Verlag, München 1977, ISBN 3-517-00650-5
  • Camille Pissarro: Briefe. Henschel, Berlin 1965
  • Lexikon des Judentums. Bertelsmann-Lexikon-Verlag, Gütersloh 1971, ISBN 3-570-05964-2, Sp. 629
  • Irving Stone - Die Tiefen des Ruhms. Der Roman des Impressionismus. Fischer, Frankfurt/Main, ISBN 3-596-28282-9

Weblingg[ändere | Quälltäxt bearbeite]

 Allmänd (Commons): Camille Pissarro – Sammlig vo witere Multimediadateie