Bahai-Weltzentrum

S Internationale Archiv vo de Bahai-Gmeind in Haifa

S administrative und geistige Wältzäntrum vo de Bahai lit z Israel ide Hafestadt Haifa. Näbed em Schrein vom Religionsstifter Bab sind uf em Berg Karmel au s Huus vo de Grächtigkeit, s Internationale Lehrzäntrum, s Internationale Archiv sowie s Zäntrum für s Studium vo de Heilige Text.

Im Bahai-Wältzäntrum befindet sich e Villzahl vo heilige Stett vo de Bahai. Zu ihne zäled d'Schrein, wo die sterbliche Überrest vom Baha’u’llah, vom Abdu'l Baha und em Bab, und ihre nöchste Familieaghörige ufbewahrt werded. Usserdem ghöred dadezue d'Hüser, wo d'Familie vom Baha'u'llah währed ihrere Verbannig drin gläbt hät oder wo imene bsundere Zämehang mit de Glaubensereignis stönd. Vili vo däne Gebäude, Monumänt und Schrein liget in ere ufwändig agleite Gartenalag am Berg Karmel und stönd näbed de Bahá'í-Pilger au Bsuecher us de ganze Wält offe.

De Berg Karmel

De Berg Karmel isch i verschidene religiöse Quälle z'finde. Zum Bispiil wird im Buech Jesaja in dr hebräische Bible prophezeit, dass es der „Berg vom Herr“ sei, zu dem „all Völker aneströöme werdet“.

De Baha'u'llah hät viermal Haifa bsuecht und uf em Berg Karmel sis Zält ufgschlage. Bi eim vo däne Ufenthalt hät er am Abdu'l Baha d'Stell zeigt, wo s'Grabmal vom Bab söll bout werde. Es anders Mal hät er s'sogenannte „Sändeschriibe vom Karmel“ gschribe. I däm wird d'Bedütig vo däm Berg für die zuekünftigi Bahai-Gmeinschaft beschriebe.

De Schrein vom Bab

Das Mausoleum birgt d'Chnoche vom Bab. De Schrein befindet sich amene Ort, wo de Baha'u'llah sälber bimene Ufenthalt in Haifa gwählt hät. De Abdu'l Baha hät d'Ufgab übercho, das Bouwerch z'errichte, die sterbliche Überrest vom Bab nach 60 Jahr Wanderschaft vo Teheran z Iran zum heilige Berg Karmel z Israel z'bringe und sie biiz'setze. Da befindet sich im Momänt au s'Grabmal vom Abdu'l Baha, wo dänn emal ugsiedlet werde söll, wänn es entsprächends Mausoleum für ihn bout worde isch.

Heiligi Stett in Haifa und Akko

De Schrein vom Baha'u'llah

Da befindet sich die sterbliche Überrest vom Baha'u'llah. Im Sälbstverständnis vo de Bahai isch dä Ort drum bestimmt worde, wil da nach em Shoghi Effendi „de heiligst Staub, wo d'Erde je i ihrem Schoß empfange hät“, bestattet isch. De Baha'u'llah isch im nördlichste Zimmer im Huus vo sim Schwigersohn Said Ali Afnan am Tag wonner gstorbe isch, am 29. Mai 1892, churz nach Sunenundergang biigsetzt worde. Zu däm Zimmer isch spöter en separate überdachte Zuegang bout worde. Täglich chömed etlichi Bahai, wo meistens im Rahme vo ihrere Pilgerreis die heiligi Stett bsueched, zu stille Gebät und Meditatione daane. Dä Ort isch aber au vo grosser Bedütig für alli ander Bahai uf de Wält, wil er als „Qibla“ d'Richtig für d'Pflichtgebät, wo d'Bahai täglich sötted mache, und s'Totegebät vorgit.

De Garte Ridvan

Di chliini Grüeninsle zmitzt imene Fluss isch dur de Baha'u'llah Garte Ridvan (arab. „Paradies“) tauft worde (nöd verwächsle mit em Garte Ridvan in Bagdad, wo de Baha'u'llah 1863 siine Sändig verkündet hät). Da hät de Baha'u'llah nach fast eme Jahrzähnt in Haft in Akko zum erste mal d'Gfängnismuure chöne verlah und d'Natur erläbe. Bis dahii isch sini einzigi körperlichi Betätigung s'Uf- und Ablaufe im Zimmer gsi.

Bahji

S'Landhuus Bahji isch uf eme Hügel, wo i de Gägend liit und früener als Al-Bahja (arab. „Ort vo de Freud“) bekannt gsi isch. Us däm ehemalige Summerpalast vomene riiche Chaufmah namens Udi Khammar, däm ursprünglich au d'Osthelfti vom Huus Abbud ghört hät, sind d'Bewohner nachere Epidemie gflüchtet. 1879 hät de Abdu'l Baha das Landhuus erworbe und's zum Wohnsitz für en Grossteil vo sinere Familie gmacht. Verschideni Rüüm vo däm Huus händ für d'Bahai e bsunderi historischi Bedütig.

S'Huus vom Abud

I däm Gebäude, wo i zwei Bereich teilt isch und als „Huus Abud“ bekannt gsi isch, hät de Baha'u'llah insgesamt fast siebe Jahr gläbt. Es isch für die Familiegrössi vom Baha'u'llah sinere Familie es viel z'chliises Gebäude gsi. Teilwiis händ 13 Persone müse i eim Zimmer läbe. Trotz däne schlimme Verhältniss isch da 1873 s'Heiligste Buech, wo Kitab-i-Aqdas heisst, offebart worde.

Literatur

Baha'u'llah, Tafel des Karmel in: Ährenlese aus den Schriften Baha'u'llahs, Kapitel 11, Hofheim 1980, ISBN 3-87037-122-6
Bahai Holy Places at the World Centre, Haifa 1968
Braun, Eunice; Krone des Karmel: die Bahai-Religion und das Heilige Land, Oxford 1982, ISBN 3-900443-04-1
Giachery, Ugo, Shoghi Effendi Recollections, Oxford 1973, ISBN 0-85398-050-0

Weblinks

Koordinate: 32° 48′ 52″ N, 34° 59′ 13″ O

Dä Artikel basiert uff ere fräie Übersetzig vum Artikel „Bahai-Weltzentrum“ vu de dütsche Wikipedia. E Liste vu de Autore un Versione isch do z finde.