Andrea Rosius à Porta

Dr Andrea Rosius à Porta (dauft am 16. Nofämber 1754 z Fiderisch; † 10. Augschte 1838 z Ftan) isch e refermierte Schwiizer Theoloog, Schriftsteller und Lehrer gsi.

s Lääbe

Dr Andrea Rosius à Porta isch dr Soon vom Johann Rosius à Porta und vo dr Anna Bonorand gsi; er isch z Fiderisch im Prättigä uf d Wält choo. Wo sini Familie es bar Joor spöter uf Zuoz gangen isch, het er dört d Schuel psuecht.

Anne 1776 isch er i die evangelisch-rätischi Synode ufgnoo worde. Er het als Lehrer im Schloss Marschlins gschaffet, isch denn Huuslehrer und Bündner Fäldprediger worde und es bar Joor lang z Frankryych gsi. Öppe 1792 isch er uf Ftan cho und dört Pfaarer worde. 1793 het dr Andrea Rosius à Porta z Ftan d Privatschuel Inschtitut à Porta ggründet, wo hüt s Hochalpyne Inschtitut Ftan isch. Bis 1829 het dr à Porta die Schuel sälber gleitet. Am 10. Augschte 1838 isch er z Ftan gstoorbe.

Rätoromanischi Schrifte

Dr Andrea Rosius à Porta het es bar Büecher uf Romanisch gschribe:

• Conversatiun tra ün stüdent nell'Engiadina bassa sopra'l stylo velg e nouf, 1793
• Reflexiuns cristianas sopra L'incenidi da Ftan arriva la not del 15/26 avril 1794, 1795
• Il magister amiaivel chi muossa als infants a lear e ad incler quai ch'els lean, 1818 (trukt z Luzäin)

Weblink

• Karin Marti-Weissenbach: Porta, Andreas Rosius a. In: Historisches Lexikon vo dr Schwiiz.