Alexander Pope

Us der alemannische Wikipedia, der freie Dialäkt-Enzyklopedy
Dr Alexander Pope um 1727
Dr Alexander Pope

Dr Alexander Pope (* 21. Mai 1688 z London; † 30. Mai 1744 z Twickenham, hüte e Däil vo London) isch en änglische Dichder, Übersetzer und Schriftsteller vom Klassizismus in dr Früezit vo dr Ufkläärig gsi.

Lääbe[ändere | Quälltäxt bearbeite]

As Katholik het dr Pope nid an de öffentlige Schuele chönne leere und isch vom ene Briester in Latiinisch und Griechisch underrichdet worde. Spööter het er au Franzöösisch und Italiänisch gleert. Mit fufzääni het er afo Gedicht schriibe. Er het Tuberkulose und Asthma überchoo und denn e Ruggegrootverchrümmig, isch nume äi Meter achtedrissig gross worde und het mit eme Gorsett müesse lääbe.

1711 het dr Pope si ersts gröössers Wärk veröffentligt, An Essay On Criticism, und isch in de literarische Zirkel vo London ufgnoo worde, zerst in deene, wo zur de opposizionelle Whig-Partei ghöört häi. 1713 isch er zu de Tories und isch Mitgliid im Scriblerus Club worde, won er dr Jonathan Swift, dr John Gay, dr William Congreve und dr Robert Harley kennegleert het. Er het die ersti Versioon vo The Rape of the Lock uusegee, won e Komödie über e Chrieg vo de Gschlächter isch.

Dr Pope het die klassische Autore bewunderet und d Ilias (1715-1720, 6 Bänd) und d Odyssee vom Homer (1725-1726, 5 Bänd) übersetzt. Mit em Gäld vo deene Übersetzige het er uf Twickenham chönne züügle, wo dr Druck vo de anti-katholische Jakobite nid so grooss gsi isch.

Dört het er e Verheltnis mit ere gwüsse Martha Blount aagfange und e Hufe bekannti Lüt wie dr Jonathan Swift sin en dört cho bsueche. 1728 het er s Spottgedicht The Dunciad as Antwort uf d Kritik an sinere Usgoob vom William Shakespeare uusegee. Im Joor 1731 het er Moral Essays veröffentligt, drei Joor spööter Essay on Man.

Dr Alexander Pope isch am 30. Mai 1744 gstorbe und het alles dr Martha Blount hinderloo.

Dr William Warburton het 1751 im Alexander Pope sini gsammlete Wärk as 'The Works of Alexander Pope uusegee.

Wärk[ändere | Quälltäxt bearbeite]

  • Pastorals (1709)
  • An Essay on Criticism (1711)
  • The Rape of the Lock (1712)
  • Windsor Forest (1713)
  • Iliad (1715-20, Homer-Übersetzig)
  • Odyssey (1725-26, Homer-Übersetzig)
  • Miscellanies (1727, mit em Jonathan Swift)
  • The Dunciad ( 728, denn e baar Mol gänderet und erwiteret)
  • An Essay on Man (1732-34)
  • Imitations of Horace (1733-37)

Nöiusgoobe

  • Vom Menschen. Essay on Man. Änglisch - Dütsch, uusegee vom Wolfgang Breidert. Meiner, Hamburg 1997. ISBN 978-3-7873-1333-4

Litratuur[ändere | Quälltäxt bearbeite]

Weblingg[ändere | Quälltäxt bearbeite]

 Commons: Alexander Pope – Sammlig vo Multimediadateie

Wikisource Alexander Pope im dütschsprochige Wikisource

 

Dä Artikel basiert uff ere fräie Übersetzig vum Artikel „Alexander_Pope“ vu de dütsche Wikipedia. E Liste vu de Autore un Versione isch do z finde.