Zäichnigsschuel Baasel

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen


D Zäichnigsschuel Baasel isch e Witerbildigsschuel im Zäichne in dr Stadt Baasel im 19. Joorhundert gsi.

Gschicht[ändere | Quälltäxt bearbeite]

Dr Markgrööflerhoof, s Dähäi vo dr Zäichnigsschuel vo 1796 aa
S ehemoolige Schuelhuus am Stäinebärg 4-6, wo d Zäichnigsschuel vo 1858 aa din gsi isch.

D Gsellschaft für s Guete und Gmäinnützige Basel (GGG) isch im Joor 1777 vom Isaak Iselin und ander Baasler Ufklärer grübdet worde und het sich vorgnoo, d Baasler Gsellschaft vor allem dur Aagebot vo Bildig und Kultur z verbessere. Scho früe het si e Näi- und Flickschuel für Mäitli ufdoo und Schüeler vo dr Zäichnigsschuel für jungi Handwärker understützt, wo sit 1782 im Klingedaal bestande het.

1796 het d GGG mit Hilf vo de Zümft und em Staat en äignigi Zäichnigsschuel im Markgrööfler Hoof an dr Hebelstrooss 4, wo d Schüeler Underricht im Zäichne und in Gemometrii bechoo häi. D Idee drhinder isch gsi, ass mä mit em Zäichne s Beobachdigsvermööge und s technische Verständnis über die däägligi Aarbet uuse chönn fördere. Drzue isch denn Usbildig vom Geschmack bi de junge Handwärker choo und d Entwigglig vo daarstellerische Fähigkäite, wil ma »nume dur d Ufkläärig vom Gäist d Mängel im Lääbe vom Äinzelne und vo dr Gsellschaft sich nit wurde lo besitige«. 1814 het au d Basler Künstlergesellschaft bi dr Läitig vo dr Zäichnigsschuel mitghulfe. Am Aafang het dr Underricht an zwäi Wuchedääg stattgfunde. D Schuel äi Leerer gha und äi Klass mit zwölf Schüeler. Zwölf Joor spööter, im Joor 1808, isch e zwäiti Klass drzuechoo, und säggs Joor druf e dritti.

Wo 1857 d Lienerd-Schuel us em Schuelhuus am Stäinebärg 4-6 uszooge isch, isch im Joor druf d Zäichnigsschuel dört iizooge.[1] Vo 1869 aa häi au Mäitli an dr Zäichnigsschuel döfe leere. Wo dr Wilhelm Bubeck 1881 Diräkter worde isch, het d Schuel scho Zäichnigs- und Modellierschuel ghäisse und het 125 Schüeler us 25 Brüef ghaa. Si het denn Klasse für Modelliere und Bildhauerei ghaa, e Moolklass, und äini für Teggstiil-Dessinatöör. Au e gümnasiale Bildigsgang mit ere Matur het s gee, wo mä denn am Äidgenössische Polytechnikum het chönne go studiere.

1887 het dr Staat d Zäichnigs- und Modellierschuel übernoo und die Allgemäini Gwärbschuel mit em Gwärbmuseum gründet. Säggs Joor spööter si d Schuel und s Museum in die nöije Geböid am Egge Petersgraabe-Spaalevorstadt züüglet.

Kwelle[ändere | Quälltäxt bearbeite]

Fuessnoote[ändere | Quälltäxt bearbeite]

  1. Ehemaliges Schulhaus Steinenberg 4 (Memento vom 8. April 2016 im Internet Archive) uf altbasel.ch, abgrüeft am 15. Merz 2016