Wyynedaal- und Suuredaalbaan

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

D Wyynedaal- und Suuredaalbaan (WSB) isch e privati Ysebaangsellschaft im Aargau. Si betribt vo Aarau us Baanlinie is Wyynedaal bis Mänzike und is Suhredaal bis Schöftle.

Gschicht und Linienetz[ändere | Quälltäxt bearbeite]

Di elektrischi Aarau-Schöftle-Baan (AS) het ane 1901 dr Betriib ufgnoo und drufabe au d Wyynedaalbaan (WTB) vo Aarau uf Rinech ane 1904. Im 1958i hend sech die beide Baangsellschafte zu einere zämegschlosse. Sider heisst d Firma Wyynedaal- und Suuredaal-Baan (WSB). Sid em Joor 2002 ghört d Baangselschaft zäme mid dr Gsellschaft Busbetriib Aarau zu dr Tachgsellschaft AAR bus+bahn.

D WSB het zwei Baanstrekene, wo früener von enand trent vo beid Syte zum SBB-Baanhof vo Aarau cho sind und wo sech jetz aber im eigete WSB-Baanhof träffe. S ganze Strekenetz isch 32,2 Kilometer lang. Es goot dur 17 Aargauer Gmäinde. D Wyynedaallinie goot vo Aarau us uf Buchs,[1] Suhr und Gräniche, denn under dr Burg Liebegg dure und uf Töifedaal, Underchulm, Oberchulm, Gonteschwiil, Zetzbu, Leimbach und uf Riinech und Mänzike. D Linie durs Suuredaal goot vo Aarau au us i die anderi Richdig, zerscht dur es Dunäll und den uf Underämpfälde, Oberämpfälde, Mue und bis uf Schöftle. Bim Baanhof vo Schöftle isch s Depot für d Züüg und au d Wärchstatt vo dr WSB.

Bis 1977 het d WSB no Baanposchtvercheer und bis 2012 au no Güetervercheer gha.

Dr Kanton Aargau als Hauptakzionäär wott, ass d WSB mid de Brämgarte-Dietike-Baan zämegoot.[2]

Bilder[ändere | Quälltäxt bearbeite]

Literatur[ändere | Quälltäxt bearbeite]

  • Jakob Heer: WSB: Wynental- und Suhrentalbahn. Aarau 1984.

Weblink[ändere | Quälltäxt bearbeite]

 Commons: Wynental- und Suhrentalbahn – Sammlig vo Multimediadateie

Fuessnoote[ändere | Quälltäxt bearbeite]

  1. Ane 2006 isch d Linie bi Buchs vo dr alte Tramstrooss verläit worde uf s ehemolige SBB-Trasse Aarau–Suhr.
  2. Urs Helbling: Der Zusammenschluss der beiden Aargauer Regionalbahnen ist heikel uf aargauerzeitung.ch vom 8. November 2016