Wikipedia:Treffen der Wikipedianer/Frühlingstreffen 2011/Protokoll

Termin: Samschtig, 21. Mai 2011 ab em Mittag bis öbe 16 Uhr am Sunntig 22. Mai
Mer hen üs z Fryburg im Üechtland troffe un üsri Berootige abghalte. Doo gsi sin de Terfili un d Flur sulegl als Gaschtgeber, de al-Qamar, de Holder, d Mireille am Sunntig mit ihrem Maa, un für en Augeblick het schynts au s Ekorn vorbigluegt. Zwüschedure sin mer go d Stadt aaluege un hen e paar Mool de Röschtigrabe überquert. Am Samschtig Oobe hemmer natürli e Original Fryburger-Fondue gmacht, un am Sunntig Noomittag hemmer s Dräffe miteme wunderschöne Blick uff d Saane un d Fryburger Altstadt vum Café Belvédère abgschlosse.

Besprächige un Ergebniss

Des sin d Überlegige un Beschlüss wommer gfasst hen. Wie nooch jedem Dräffe sin des kei entgültigi Beschlüss, sundern jede wo mit öbis nit yyverstande isch, cha en Punkt uffem Stammtisch zur Diskussion bringe.

Houptsyte

De Artikel vo de Wuch wird mitenere Vorlag yybunde, wo automatisch am Änd vo de Wuch weggslet. Eso cha de Terfili die Vorlage scho im vorruss mache, un muess nit jedi Wuch dra denke oder in de Ferie es Internetcafe finde. De Holder duet emool so e Vorlag baschtle. Usserdäm het de Terfili s Schema erklärt, wienner de AvdW usswäält.
Mer wenn de Dialäkt, wo standardmässig uff de Hauptsyte aazeigt wird, jedi Wuch zwüsche Schwyzerdütsch - Badisch - Elsässisch - Schwäbisch weggsle lo. Des mache mer mitenere automatische Vorlag. Wänn's technisch goot, wär di bescht Löösig, dass für IPs ussem Elsass d Syte uff Elsässisch chunt, für eine uss de Schwyz als Schwyzerdütsch usw. Mer wisse aber nit, ob des technisch mögli isch. Als wytri Dialäkt chönnte mer no Wallisertitsch un Vorarlbergisch dezue, wänn öber emool öberen zum übersetze findt. Andri Dialäkt sin aber nit notwändig, wyl sich die mit eim vo dänne Dialäktnäme chönne identifiziere (z.B Bodeseealemanne mit Schwäbisch). Dass de Schwyzerdütsch Teggscht uff Bärndütsch isch, isch nit schlächt, aber wemmer emool öberen hen, chönnte mer au en "neutralere" Dialäkt nee. Lozärnerdütsch wär e gueti Lösig.
Mir dien d Hauptsyte überarbeite. Di bairisch Houptsyte dunkt üs glunge. Als erschte Schritt wird en Deil vo de Yyleitig ussegno, wo mee wie e Ermahnig dönt, was mer jo nit wenn. De Yyleitigsteggscht mit Charte sött wie uff bar. rächts sy, un links chunt defür e Chaschte mit Portal, Kategorie usw. Dörte wo jetz d Rubrike "Aktuell" un "Themeportal" sin, mache mer e Chaschte mit verschidni Artikel, öbe noochem Vorbild vo "Schon gewusst?" uff de. & "Did you know..." uff en. Erschti Vorschlag für de Name vo dere Rubrik sin "Jo dass es des git..." oder "Was es au no git" gsi. Was gnau in die Rubrik chunt, hemmer nit ganz gchlärt, aber z.B neui Artikel, intressanti oder zuefällig ussgwäälti, aktuelli Theme, Jubiläe. Ob mer aktuelli Theme sött bsunders ussehebe, hemmer verschidni Meinige gha: de Holder findet es guet, wyl mer so cha zeige dass mer nit numme über Dialektologi un alti Manne schrybe, de Terfili meint dass aktuelli Theme nit unbedingt uff de Hauptsyte mien usseghobe werde, wyl's nit s Zyyl vo de alemannische Wikipedia cha sy, e Noochrichteportal z sy.

Leitfade Neuling

Mer hen de Leitfade Wikipedia:Neuling besproche. De Vorschlag vum al-Qamar isch uff e gueti Resonanz gstosse un cha allene regelmässige Benutzer wo vil mit Neuling in Kontakt träte, sehr aa s Härz glait werde. Bstimmti Vorschleg wie de neue, fründlichere Begriessigsteggscht sin scho bruucht worde. Au dass mer neue Artikel e Chance git, un nit sofort 10 Minute spööter en Stumpe sofort ussbaut, het sich besseret. Mer hen üs no e paar Ergänzige überlait. Wemmer z.B en Neuling uff en Regelverstoss hyywyyst, sött mer die Regel jeds Mool gnau begründe un erkläre, worum si in däm konkrete Fall nützlig isch. Sunscht chönne Neuling vilycht nit noochvollziene, worum si öbis falsch gmacht hen.

Em Terfili isch uffgfalle, dass vili Regle sehr bürokratisch un uff s Komma gnau umgsetzt worde, un die etablierte Benutzer mangmool bim Zruggsetze e weng schnell de "Finger uffem Abzug" hen. Bsunders über s Zruggsetze vo Dialäktändrige hemmer üs Gedanke gmacht. Bi Artikel, wo inhaltlich un sproochlig guet sin, isch die Regel sinnvoll un notwändig. Aber bi Artikel wo sowiiso no verbessrigswürdig sin oder nit imene konsistente Dialäkt sin, sin Dialäktändrige weniger dramatisch. Vilycht meine es bstimmti Lüt numme guet oder wenn es emool ussprobiere, un no cha e sofortigs Zruggsetze abschregge. Des gilt bsunders, wänn numme einzelni Wörter gänderet werde, un de Artikel sowiiso nit inere eiheitliche Schrybig isch. In so Fäll sött mer sich zrugghalte un nit jeds Mool zruggsetze.

Insgsamt sött mer sich bi guet gmeinte Änderige sehr zrugghalte, eifach emool warte, oder en andre frooge. Au mittelmässigi Schryber sötte uff de alemannisch Wikipedia en Blatz ha.

Hilfe- un Richtliniesyte

Üsri Hilfe un Richtliniesyte sin zur Zit zimli strukturlos un wenig hilfrych. Vili sin uss de.wiki übersetzt, aber au nit alli wo vorgsänne sin, un mangmool sin au die dütsche Orginalsyte wenig hilfrych. Usserdäm überschnyde sich vili Syte un insgsamt sin üsri Hilfesyte en Schmarre. De Terfili het emool versuecht en Überblick z übecho, un het's bis hüt nit gschafft. De Terfili dät des gärn emool vo Grund uff neu strukturiere, findet es aber eifacher, wemmer di meischte Syte zerscht emool in de Wikipedia:Schopf verschiebt un deno des wiider zruggholt, wo en Daug het. Insgsamt bringt e schlanks System vo Hilfesyte mee wie detailierti Aaweisige. Für detailierti Hilfesyte sötte mer besser uff de. verwyyse.

Stumpe-Vorlag un 5-Sätz-Regle

Mer hen drüber diskutiert ob d Stumpevorlag öbis bringt, wo uff de. z.B scho lang abgschafft worde isch. Hauptvordeil vo derre Vorlag isch, dass mer churzi Artikel zum Erwiitre schnäll findt. D Praxis vo de letschte 7 Joor het aber zeigt, dass des praktisch nie öber macht. Es isch hüt mit hunderti vo Artikel mit Stumpevorlage au gar nümm so eifach, in de Stumpe-Kategori en Artikel zum Erwiitre z finde. Wänn öber en Artikel wott erwiitre/ussbaue, no macht de des sowiiso, mit oder ohni Stumpevorlag. Dezue chunt no, dass es schwierig isch Kriterie z finde, was überhaupt en Stumpe isch, un dass d Stumpevorlag nit ällwell yygsetzt un au nit ällewell wiider ussegno wird. Wäge däm meine mer, dass mer die Vorlag chönnt abschaffe.
Mer hen über Vor- un Noochdeil vo de 5-Satz Regle grüblet. De Terfili findet's schad, wemmer Artikle löscht, wo zwar numme 1-3 Sätz hen, aber imene Dialäkt wie Wallisertitsch sin, wo bi üs sälte sin. Mer hen inzwüsche au gnue gueti Artikel, dass e paar Mini-Stumpe nit so dramatisch sin. Usserdäm werde vilycht Neuling abgschreggt. Bi Artikel unter 5-Sätz, wo über e alemannischs Thema un vumene nit-etablierte Benutzer sin, sött mer also weniger streng sy. Für Autore wo scho lang debi sin un vil schrybe, giltet die Regel aber wyter.

Neui Ideje un Projäkt

De Holder het vorgschlo dass mer themeverwandti Artikel besser mitenand verchnüpft. Bis jetz wird des vorallem mit Links unter "Lueg au" gmacht, was aber wenig effizient isch. Es wär besser, wemmer Vorlage mit Themering mache, wo am Schluss vumene Artikel gsetzt werde, wie's uff de. un en. au ieblig isch. E Byspil gseet mer im änglische Artikel en:Semnones.
Gwüssi Artikel wie Gmeindsartikel, Artikel über läbigi Persone, Künschtler, Band, Sport-Verein usw veralte mit de Zit. Des isch für üser Image nit so guet. Grundsätzli bruucht's halt mee Lüt, wo so Artikel pflege, aber demit des eifacher goot, wär e Syte mit ere Lischte vo Artikel, wo potenziell veralte chönne, nit schlächt.
S Projekt Artikelusszeichnige bringt zur Zit nyt, wyl mer nit gnue Lüt hen, wo abstimme dien.
Mitem Entwurf für e Wikiheftli, wommer emool gmacht hen, lauft im Momänt nyt. Mer hen alli grad z wenig Zit un Gäld, zume öbis demit z mache.
De Holder un de al-Qamar hen mehreri Audiouffnaame für s Projekt Wikipedia:Gesprochene Wikipedia gmacht un de Terfili duet si uffelade. Mer hen vor im Oktober (?) wiider en Monet lang alli Artikel vo de Wuch als gsprocheni Version aazbiete, un vilycht vo jetz aa regelmässig.
Mer hen überlait ob mer bi bstimmte Name wie Züri oder Schwyz, wo sehr verbreitet sin, nit chönnte alemannischi Wyterleitige mache, oder sogar uff s alemannischi Lemma verschiebe. Des Thema isch aber nit ussdiskutiert worde.
De Holder het gmeint dass mer wäge de Debate um d Christbäum (vili roti Links), inzwüsche sogar in mangi Artikel vil z wenig Links hen. De Terfili het gmeint, dass Artikel wo verlinkt sin, mee gläse werde, aber mer sött Links sinnvoll setze wyl Forschige zeigt het, dass Links für d Lesegschwindigkeit verheerend sind.
De Holder het vu dr Radiosändig Schnabelweid verzäält, wo vum Christian Schmid gmacht wird. Vilycht chönnte e paar vo üs emool inere Sändig uffträtte.

Ortsartikelprojäkt

De Holder het s Programm erklärt, wommer für d Erstellig vo Ortsartikel cha bruuche. Es handlet sich debi nit um en eigentliche Bot, sunder mer erstellt vo Hand e Datebank, wo deno automatisch cha uffeglade werde, statt dass mer jeds Mool uff "Artikel nöi aalege" go muess. Als Teschtlauf het de Holder es für gwüssi Landkreis un für s Departement Belfort un für Lothringe yygsetzt. Hintergrund isch, dass mer vor de Ortsartikel-Aktion für s Elsass, öbe 800 Ortartikel (in de Alemannia) gha hen. In de Alemannia git's aber öbe 5000 Gmeinde.

De Terfili meint, dass es wichtiger isch, dass mer über Theme, wo mit em Alemannische z tue hen, schrybt. Er findet's schad, wänn sich Lüt, wo sehr guet schrybe chönne, numme no uff so Projäkt oder uff s Übersetze vo Medie-Hypes konzentriere. Eso Artikel mache über d Interwikilinks zwar Lüt uff üs uffmerchsam, aber dass es sich deno für öberen lohnt, sich au so uff de alemannische Wikipedia z informiere, des chönne mer numme durch bsundri Informatione bringe, wo sunscht in Bibliotheke verstaube. En Elsässer goot deno wiider, wenner zwar luuter Ortartikelstumpe gseet, aber wenig informativi Artikel über elsässischi Persönligkeite oder Kultur oder solang d Artikel Elsässisch un Elsass kei Vorzeigeartikel sin. D Hypothese vum Terfili isch, dass regelmässigi Läser irgetwenn zue Schryber werde, dass öber aafängt schrybe, ohne devor en regelmässige Läser z gsi sy, des wär wohl e grossi Ussnaam. Des meint uff jede Fall de Terfili. Wänn de Henri Berger alli paar Wuche en Artikel über schwäbischi Schriftsteller o.Ä schrybt, no dät des 1000-Mool mee bringe für d Presänz vum Schwäbische uff de Wikipedia, wie wemmer jetz für alli schwäbischi Gmeinde Ortsartikelstumpe hen.

De Holder meint dergege, dass er sich zur Zit für eso Datesammlige für Lothringe oder s Tessin interessiert, un nit defür, en Artikel über elsässischi Dichter z rescherchiere. Worum sött er also nit des mache, wonnen grad interessiert. Usserdäm wäre die Artikel nit eso informationsarm, welle Dialäkt/Patois dört gschwätzt wird, dät mer z.B weder uff de. noch uff fr. finde. Wemmer z.B über jede Dialäkt wo's e Monographi drüber git, öbis wott schrybe, no isch's ganz nützlig wemmer scho en Artikel het. Über d Interwikilinks werde usserdäm Lüt uff üs uffmerchsam. Er hät usserdäm d Erfahrig gmacht, dass z.B uff Dräffe vo de Muettersproch-Gsellschaft, d Lüt vilmool aa de alemannisch Wikipedia kritisiere, dass es für vili Ortschafte kei Artikel git. D Lüt meine schynts, dass es e Entscheidig vo de "Redaktion" isch. Artikel über bsundri Informatione interessiere au numme bsundri un wenigi Lüt.

De al-Qamar meint, dass öbe 5% Ortsartikel-Stumpe d Schmerzgränz sin. Wänn bis zumene Drittel vo üsre Artikel eso sin, chönnt des üsrem Image schade. Grad eso Massegenerierige werde chlyne Wikipedie jo oft vorgworfe. Es wär emool e gueti Idee, wemmer sich aaluegt was für Artikel vo IPs bearbeitet werde (z.B Tippfäälerkorrekture). Des sin no vilycht au die Artikel, wo datsächli gläse werde.

Mer sin üs in däm Punkt nit einig worde, mer miesst des emool zur Diskussion stelle.

Sunschtigs

De Terfili het Phonogram-Analyse vo Fortis und Lenis-Konsonante im Idiolekt vum Holder un em al-Qamar gmacht. Es isch debi ussecho, dass em al-Qamar syni Fortis lenger wie syni Lenis sin, derwyyl de Holder numme churzi Lenis het. Allerdings het de Holder zum Deil au halblangi Plosiv, was mer als Indiz für de Sproochkontakt zwüsche sym Opfigerdialäkt un em Züridütsch vo sym Wohnort interpretiert hen.
D Flur sulegl, wo bis jetz nonit vil uff de Wikipedia gschrybe het, isch jetz motiviert au emool öbis uff de alemannische un rätoromanische Wikipedia z schrybe.
De Holder het vum Strategi-Dräffe vo de Muettersproch-Gsellschaft berichtet. De Verein macht sich Sorge wäge Überaltrig vo syne Mitgliider, un wott d Jungi mee aaspräche.
D Mireille het vumene Wörterbuech-Projäkt im Elsass verzäält, wo aber no in de Teschtphas isch.

Terfili, 22. Mai 2011, Fryburg im Üechtland. Für spööteri Ergänzige, lueg in d Versionsgschicht. --Terfili 21:58, 22. Mai 2011 (MESZ)[Antwort gee]