Bii tapfer!

Us der alemannische Wikipedia, der freie Dialäkt-Enzyklopedy
(Witergleitet vun Wikipedia:BTA)
Huusmittel gege Wikistress: Zrucklähne un e Schisseli Tee

Bii tapfer! isch e Empfählig, wu vor allem Neji in dr Alemannische Wikipedia sotte beachte. Di neje Benutzer sotte nit nume muetig gnue fir d Mitarbeit syy, sundern au tapfer gnue, Kritik un Uufryndligkeit uuszhalte, wu s in allene mänschlige Gmeinschafte git. Vor allem wänn eber wenig oder gar kei Erfahrig het mit Wikis oder em komplexe Syschtem vu dr Wikipedia, sott er dää Rot behärzige.

D Alemannisch Wikipedia stoht uffe fir e jede un isch aagwise uf neji Autore. Do schaffe vil Lyt us allene alemannische Regione zämme mit verschidene Läbensyystellige, mit unterschidlige Vorstellige, wie d Wikipedia soll ussäh. S cha syy, ass elteri Diskussione un Froge vu Neje wider firi gholt wäre, wu anderi Benutzer kei grosses Inträssi dra hän, die Diskussion nomol z fiere.

S cha au passiere, ass Neji d Regle un Richtlinie nit chänne un sich wäge däm nit dra halte oder ass si sich nit an die Regle bunde fiele, wel si nit an dr Diskussion beteiligt gsi sin. Villicht sin si scho vu andere druf ufmerksam gmacht wore un si mache die Fähler einewäg no. So ebis cha zuen ere dytlige Kritik fiere.

E mänkmol git es au, ass neji Mitarbeiter sich nit an grundlegendi Stil- un Umgangsregle halte, wel si si nit chänne.

Wikistress sott mer muetig chenne uushalte. Wänn erfahreni Benutzer seli vilmol anderi Benutzer uf d Regle mien hiiwyse, no cha si des au emol wietig mache oder si resigniere. Fir di erfahrene Benutzer hilft s vilmol, wänn si sich dra erinnere, ass si do sälber emol nej gsi sin un au nit alli Regle gchännt hän. Niemer isch as versierte Wikipedianer uf d Wält chu.

Mer sott au ab un zue emol dra dänke, ass d Wikipedia insgsamt, aber au un grad di Alemannisch Wikipedia, nie entstande wär, wämer alli Lyt, wu hän welle mitmache, zwunge hätt, zerscht emol s Richtlinie-Handbuech uuswändig z lehre. Verletzige vu Regle sin e Bstandteil vu dr „Wikipedia-Kultur“.

Tapfer z syy heisst, nit jedes Wort uf d Goldwoog z lege. E mänkmol hilft s eim, wänn mer eifach emol gueti Musik hert, e Tee oder e Kaffee trinkt, e paar Stund uusrueit oder in Wald go spaziere goht. Di meischte Lyt, wu ein aastränge, wän nit bes syy: si wän hälfe. Un villicht het jo sogar dr eint oder ander vun ene ab un zue emol rächt ...

Vil Freid, Muet, Glasseheit un Unterscheidigsvermege!