Wettiger Nochrichte

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
S Logo vo de Wettiger Nochrichte
De Fabi Schmid (rächts) und de Lutz Fischer, d Redaktore vo de Wettiger Nochrichte

D Wettiger Nochrichte sind es Online-Nochrichte-Portal, wo Neuigkeite us de aargauische Gmeind Wettige in Mundart verbreited. S Portal gids sit Aafang April 2012,[1] wobi es erst sit em 2014 breiter wahrgnoh und gläse wird.

Gschicht[ändere | Quälltäxt bearbeite]

Wer d Wettiger Nochrichte im 2012 gründed hed, isch ned bekannt und au ned warum es zur Gründig cho isch. Im erschte Johr het s Portal ned emol es Duzend neui Biträg und au im 2013 isch ned viel gloffe. De Ufschwung hed dann im 2014 iigsetzd, wo d Betriber regelmässig Biträg veröffentlichd und mit eme Facebook-Profil d Site bekannt gmached hend. Meh wie 2'000 Bsuecher hend über 4'000 Site aaglueged. Im 2015 sind es dann über 7'000 Bsuecher mit meh wie 12'000 Siteufrüef gsi.[2] 2015 isch au insofern iischnidend gsi, wil der oder die bisherige Betriber mitteiled hend, dass sie s Projäkt nüm witer chönne betriebe. D Nachfolg hend dann de Fabi Schmid und de Lutz Fischer aaträte, wo vorher scho immer wider Föteli für d Wettiger Nochrichte glifered und au en YouTube-Kanal ufbaued hend gha.[3] D Zugriffszahle sind au im 2016 witer gstige, so dass scho am 19. April 2016 d Zahle vom Vorjohr erreicht worde sind.[4]

Im Früehlig 2017 isch de Markus Haas zum Redaktionsteam dazuegstosse, het aber wege sinere Wahl in de Gmeindrot uf s Johresänd 2017 sin Ustritt us de Redaktion müesse bekannt geh.[5] Am 31. Dezember 2017 hend d Redaktore mitteild, dass d Site zum noie Johr vo .net uf .ch zügled, wobi di alte Biiträg unter de alte Adresse erhalte bliibe sind.[6]

Im März 2019 hend d Wettiger Nochrichte is Limmattal expandiird und betriibed sither au es Nochrichteportal, wo sich «Limmattaler Nochrichte» nennt.[7]

Weblink[ändere | Quälltäxt bearbeite]

Fuessnoote[ändere | Quälltäxt bearbeite]

  1. De ersti Iitrag isch vom 2. April 2012
  2. D Wettiger Nochrichte sind Dank oich en Erfolggschicht vom 19. April 2016
  3. Wettiger Nochrichte: Über öis
  4. D Wettiger Nochrichte sind Dank oich en Erfolggschicht vom 19. April 2016
  5. Markus Haas us em Redakoreteam verabschiidet
  6. Mir zügled vo .net uf .ch
  7. «D Limmattaler Nochrichte sind online!»