Vorlage:AdW/28
Das älteste Gewerbe der Welt|Das älteste Gewerbe der Welt
Das älteste Gewerbe der Welt (Originaltitl: Le plus vieux métier du monde, uff schwäbisch: S eldeschde Gewerbe vo dr Welt) ischt a franzeesisch-deitscher Schbiilfilm en sechs Episoda vo sechs vrschiidene Regisseur (lueg en d Info-Box). S erscht Môl ens Kino komma isch der Film en Deitschland am 6. Abril 1967.
A-ma scheena Dag kommt a jonger Hendler ens Dorf. Der siht so guad aus, dass glei älle Dorf-Scheeheida en-an vrnarrt send, so au d Brit. De sell abr kô et begreifa, dass der ausgerechnet vo ehra nix wissa will. Drom frôgt-se da alda Môler, wo fir sei Weisheit bekannt ischt ond fir dean se sich oft als Modell zor Vrfigong stellt, om Rôt. Der moint, r kennt-ra helfa. Glei mischt’r vrschiidene Farba ond tregt-se behutsam an a baar Stella vo dr Brit ihrem Gsicht auf. Dô drmit macht’r sei schees Modell noh viil scheener: S „Make-up“ ischt erfonda.
Uff oimôl isch der jonge Hendler hin- ond hergrissa vo sellem bezaubernda Mädle. Dui abr merkt, dass a Frau, wo vo-ma Môô begehrt wuud, sich deam au vrweigra kôô. Ond nadiirlich kô-se dui Vrweigerong au uffgäa, wenn sich der Môô des ebbes koschda lôôt. Dô druff fangt dr Vrehrer ôô, sein Schwarm mit Gschenk zo ibrheifa: Kupferstickla, Muschla, Halskedda … Schliaßlich geit d Brit deam hartnäckiga Werba nôch ond nemmt da jonga Môô mit zo-ra Grodde – ooglaiblich bestaunt vo ihre Stammesgenossa, wo sich frôget, wo dees noh amôl nôfihra soll.