Viktor I.

Us der alemannische Wikipedia, der freie Dialäkt-Enzyklopedy
dr Viktor I., Glaasfänschter, Pfaarchilche Semmering

Dr Viktor I. († 199 z Rom) isch vu 189 bis zue sym Dod anne 199 Bischof vu Rom gsii. Dr Viktor I. isch en energische Bischof gsii un isch bekannt wore fir d Latinisierig vu dr remische Chilche, wu dodmol no vu griechische Yyfliss dominiert gsii isch. Vermuetli het er vu Nordafrika gstammt.

Läben un Pontifikat[ändere | Quälltäxt bearbeite]

Dr Name vu däm Bischof isch vor allem mit Oschterfeschtstryt iber dr Oschtertermin verbunde, wu scho syt em Anicetus haiß dischpetiert woren isch.

S Oschterfescht isch vu dr chlaiasiatische Gmaine, dr sognännte Quartodezimanäer am 14. vum jidische Monet Nisan (Paschafest) gfyyrt wore, in dr weschtlige Chilchen am Suntig derno. Nit klar sin d Grind doderfir – villicht s Inträssi vun ere Verainhaitlichung, unter Umständ au d Propaganda vun eme gwisse Blastus gege dr weschtlig Oschtertermin oder s Bsträbe, dr Termin vum Paschafescht z myyde. Di letschtgnännt Megligkait giltet am wahrschynligschte, wel di um des Zyt no jung Chilche si dytli het welle dischtanziere vu ihrem judische Ursprung.

Dr Viktor het in vylne Gmaine Synodie abghalte, wu sich em aagschlosse hän, mit Uusnahm vu dr chlaiasiatische Gmaine. Dr Viktor het die Gmaine us dr Chilchen uusgschlosse. Mit däre Exkommunikation het er e Huffe Lyt in dr Chilche gege si ufbrocht. S giltet as di erscht autoritativ Maßnahm vum Papschttum. Dr Irenäus vu Lyon het em Viktor s Rächt doderzue nit abgstritte, het d Exkommunikation aber abglähnt, wel dr Aaloss nume ne liturgische, kai dogmatische gsii isch. Dr Viktor het noogee un het dodermit d Gfohr vun eme Schisma abgwändet.

Seli energisch het si dr Viktor I. gege d Lehr vun Monarchianismus gwändet, wu um des Zyt ufchuu isch. No däre Lehr sei dr Chrischtus bis zue syre Daifi ne gwehnlige Mänsch gsii. Dr Viktor I. het dr Gäldhändler Theodotus vu Byzanz, dr Fierer vu däre Gruppe un dr Schriftsteller Florinus exkommuniziert.

Sy katholische Gedänkdag isch dr 28. Juli.

Literatur[ändere | Quälltäxt bearbeite]

  • Josef Rist: VICTOR I.. In: Biographisch-Bibliographisches Kirchenlexikon (BBKL). Band 12, Herzberg 1997, ISBN 3-88309-068-9, Sp. 1334–1337.
  • Johann Peter Kirsch: Pope St. Victor I. In: Catholic Encyclopedia, Band 15, Robert Appleton Company, New York 1912 (änglisch)

Weblink[ändere | Quälltäxt bearbeite]

 Commons: Victor I – Sammlig vo Multimediadateie
Dä Artikel basiert uff ere fräie Übersetzig vu dere Version vum Artikel „Viktor_I.“ vu de dütsche Wikipedia. E Liste vu de Autore un Versione isch do z finde.