Ursina Giger
D Ursina Giger (* 1985 z Disentis/Mustér) isch e Schwyzer Singer-Songwriterin un Musikeri.
Lääbe[ändere | Quälltäxt bearbeite]
D Giger isch z Disentis mit Romanisch as Muetersproch ufgwachse. Ab 1998 isch si uf d Chloschterschuel gange un het dert anne 2004 d Matura gmacht. Scho as jung Maidli het si Klavier- un Gsangsunterricht iberchuu. An dr Schuel het si im Chor gsunge. As teenager het si bim Bindner Gsangswettbewärb «Vusch 04» mitgmacht.
No d Schuel het si z Züri dr Vorkurs am Konservatorium in Klassik un Jazz bsuecht. Vu 2006 bis 2012 het si an dr Hochschuel Lozärn Musikpedagogik mit Schwärpunkt Jazzgsang studiert.
Im Rame vume Erasmus-Uusdusch isch si 2010 uf Kopenhagen, Dänemark, un het dert fir ai Johr am Rytmisk Musikkonservatorium studiert. Z Kopenhagen het si mit dänische Kamrade d Band «Ursina’s Danish Laboratory» grindet un mit ene d EP «Lontan» ufgnuu.
No aim Johr isch si retuur chuu in d Schwyz un uf Züri zoge. Syt 2012 unterrichtet si as Gsangslehreri an dr Musikschuel z Stans.
Si het mit dr Martina Berther (Bass) un em Marcel Vogler (Vibrafon un Percussion) s Jazz-Trio En Treis grinde, het bi dr Wältmusikformation Quintinò un im «Stimmorchester» mitgsunge. Derzue het si as Backgroundsängeri in Konzärt vu dr Nyna Cantieni gsunge.
Mit em Roland Wäspe (Gitarre), dr Martina Berther (Bass) un em Nicolas Stocker (Schlagzyyg) het si 2013 unter em Bandname Ursina d EP «Time Is A Thief» ufgnuu. Im nämlige Johr het si bi dr erschte Uusgab vu dr «Swiss Live Talents Awards» zwee Bryys gwunne, dr Publikumsbryys un dr Bryys „National Language“ fir Chinschtler, wu in aire vu dr Schwyzer Landessproche singe. Anne 2014 het si ihri zwoot EP uusebrocht: „Hiding behind a mask“. Im Jänner 2017 isch ihr Debutalbum «You have my heart» uusechuu, produziert vum Pola Roy, em Schlagzyger vu dr dytsche Band «Wir Sind Helden». Zwai vu dr insgsamt zee Lieder uf em Album sin uf Romanisch («En In Mund» un «Affonza»), di andere uf Änglisch.
Im e Porträt uf laut.de haißt s iber d Ursina:
„Ihre einzigartig weiche Stimme und die sphärischen Stücke machen Ursina zu einer Künstlerin, deren Lieder zum Träumen einladen. Sie vereint folkiges Songwritertum mit spielerisch leichten Popklängen, die immer etwas Mystisches umgibt.“
Mit dr Corin Curschellas un dr Astrid Alexandre het d Giger s Trio „La Triada“ grindet, wu rätoromanische Volkslieder sammlet un dreistimmig uffiert.
Wäärch[ändere | Quälltäxt bearbeite]
- Time is a thief. EP (2013)
- Hiding behind a mask. EP (2014)
- You have my heart. Album (2017)
Mit Ursina’s Danish Laboratory
- Lontan. EP (2011)
Weblink[ändere | Quälltäxt bearbeite]
Commons: Ursina Giger – Sammlig vo Multimediadateie- ursinamusic.com
- Triumph für Bündner Sängerin Ursina, Südostschweiz, 11. November 2013
- Fragebogen:Ursina, Interview mit dr Ursina uf bleistiftrocker.de, 11. Februar 2017
- Ursina Giger uf klangwelt.swiss
- Jazzsängerin Giger konzertiert in Chur, Südostschweiz, 17. April 2011