Nyna Cantieni

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

D Nyna Cantieni (* 28. Februar 1986 z Kuur) isch e Schwyzer Pop- un Jazzsängeri.

Läbe[ändere | Quälltäxt bearbeite]

D Nyna Cantieni isch z Kuur as Dochter vum Musikerbaar Roman un Dorothea Cantieni-Gnehm ufgwachse. As Chind het si Blockflete, Gyge un Klavier glehrt, mit 15 het si derno klassische Gsangsunterricht bi dr Altischti Stefania Huonder z Pfäffike SZ iberchuu. As aini vu dr Gwinnerne vum Bündner Jugedmusikwettbewärb het si mit 16 Johr e Haydn-Arie mit em Bündner Chamerorcheschter gsunge.

No drei Johr klassischem Gsang het si au aagfange mit Jazz- un Popgsang. Anne 2004 het si z Disentis dr Gsangswettbewärb „Vusch 04“ gwunne. An dr Jazzschuel Züri het si ai Johr lang Unterricht in Jazzgsang bi dr Marianne Racine gnuu, derno het si sich entschlosse, Musikeri z wäre.

No dr Matura het si fimf Johr Jazz un Pop an dr Swiss Jazz School an dr Hochschuel vor Chünscht (HKB) z Bärn studiert un het dert im Summer 2008 e Bachelor of Art un derno anne 2010 e Master of Arts gmacht.

Syt 2005 unterrichtet si an dr Musikschuel Münchebuchsi, im Augschte 2010 het si au no ne Stell as Gsangslehreri am Konservatorium Bärn aagnuu.

Musik[ändere | Quälltäxt bearbeite]

D Nyna Cantieni het e baar Johr as Hintergrundssängeri fir e Huffe Schwyzer Musiker gsunge, unter anderem fir dr Duke, dr Gimma un d Sandee. Au as Jazzsängeri dritt si mit dr Band 9And more syt e baar Johr uf.

Anne 2013 het d Cantieni unter ihrem Vorname Nyna ihre erscht Album «Gold» mit aigene Lieder in ihrem Bündner Dialäkt uusebrocht. Fir des Album het si mit dr Bärner Produzänte Ben Mühlethaler, SAD un Roman Camenzind zämmegschafft. Bi ne Dail Lieder hän au Gaschtmusiker mitgmacht, unter anderem d Steff la Cheffe, dr Gimmas Part, Breitbild un dr Tommy Vercetti. Im letschte Lied het e klassisch Strychquartett mitgwirkt. Stilistisch isch s Album e Mischig us Soul, R’n’B un Hip Hop. Zäme mit der Steff la Cheffe singt si ou Chinderlieder uf em Album Jimmy Flitz-ChinderWiehnacht mit em Roland Zoss.

Anne 2016 isch ihre zwait Album «Uma’s Songs» uusebrocht, wu s mee Soul din het.

Diskografi[ändere | Quälltäxt bearbeite]

Albe
  • Gold (2013)
  • Uma’s Songs (2016)
Singles
  • Bittersüess [QC feat. Nyna Cantieni] (2011)
  • Maschina (2013)
  • Gold (2013)

Uuszaichnige[ändere | Quälltäxt bearbeite]

  • Dezämber 2008: Kulturbryys vu dr Karajan-Stiftig
  • Novämber 2011: Ferderbryys vum Kanton Graubünde

Weblink[ändere | Quälltäxt bearbeite]