D Baasler Brandankapälle

Dialäkt: Baaseldütsch

D Brandankapälle isch e chliini Chille am Bluemerain im Baasler Vorstedtkwardier gsi. Si het in dr Reformazioon iiri Rolle as Gotteshuus verloore und isch bald druf abgrisse worde.

Gschicht

Dr Häilig Brandan, im dütsche Sproochgebiet het men em vilmol au Brandolf gsäit, het im 6. Joorhundert gläbt und isch äine vo de Zwölf Apostel vo Irland gsi. Dr Kunsthischtoriker Casimir Hermann Baer (1870-1942) het vermuetet, ass dr Kult um dr Häilig Brandan im 7. Joorhundert, wo d Iire uf em Kontinänt missioniert häi, uf Baasel khoo sig.

E Kapälle am Bluemerain isch erst sit em 13. Joorhundert erwäänt. Im Juli 1291 het s e Vergliich zwüsche de Lütbriester vo Sankt Peter und de Johanniter gee, wo din e Kapälle vom häilige Niklaus erwäänt wird. Die het de Johanniter ghöört und zu dr Gmäind Sankt Peter ghöört. Im 19. Joorhundert isch e Theorii ufchoo, ass das emol d St. Brandankapälle gsi sig, wo noch ere Renowazioon e nöije Häilige überchoo het, aber dr Rudolf Wackernagel (1855-1925) het das nid für glaubwürdig ghalte. Uf jede Fall wird no ums Joor 1500 e Sankt-Brandolfskapälle dört erwäänt. Si het aber scho vor dr Reformazioon iiri Bedütig verloore und nochhär isch si brofanisiert worde. 1550 isch si Däil vo dr Liigeschaft vom Gasthoof zur Blueme gsi. Gege s Ändi vom 16. Joorhundert isch d Bäiz abgrisse worde und mit ere isch au d Brandankapälle verschwunde.

Au dr Sankt Brandolfsbrunne, wo si Naame vo dr Kapälle überchoo het und wo no im 18. Joorhundert dr Johann Jacob Spreng (1699-1768) d Kwalidäät vom Wasser von em globt het, git s sit 1725 nüme. Er het sich öbbe wisawii vom hütige Drei Köönig befunde und isch ooni Spuur verschwunde.

Kwelle

• Brandolfsbrunnen und St. Brandankapelle in Basel uf altbasel.ch, abgrüeft am 1. Merz 2015