S Spiilzüügmuseum, s Dorf- und Räbbaumuseum z Rieche

S Spiilzüügmuseum, s Dorf- und Räbbaumuseum z Rieche

Dialäkt: Baseldütsch

S Spiilzüügmuseum, s Dorf- und Räbbaumuseum z Rieche bi Baasel befindet sich an dr Baaselstrooss 34 im Alte Wettstäihuus us em 17. Joorhundert, wo si Naame vo sim ehemoolige Bsitzer Johann Rudolf Wettstäi überchoo het. Es isch e dreidäiligi Sammlig und zelt zu de Kulturgüeter im Kanton Baasel-Stadt, wo nazionali Bedütig häi.

Gschicht

S Spiilzüügmuseum isch 1972 iigrichdet worde und isch s erste in dr Schwiz gsi. Zum zwanzigjöörige Jubileum het mä d Usstelligsflechi um 230 uf 900 Kwadratmeter vergrösseret, 500 Kwadratmeter si em Spiilzüügmuseum gwidmet. Mä het die drei Abdäilige besser drennt und us em Räbbaumuseum en äigeständigi Sammlig gmacht.

D Sammlige

S Spiilzüügmuseum stellt en umfangriichi Sammlig vo öiropäischem Spiilzüüg us, wo zum Däil em Baasler Museum vo de Kulture ghöört, zum Däil s Legat vom ene brivate Sammler isch. Dr Schwerpunkt lit uf Holzspiilware, Diddistube und -chüchene, Blächspiilzüüg, Blei- und Zinnfigure, Babbiirtheater und Iisebaane. Ländligs Naturspiilzüüg (Dannezapfe, Chnoche) und Objekt us gwärblig-industrielle Härkumft (Nürnbärg, Erzgebirg) wiise uf underschidligi Forme vo dr früenere Erziejig aane. E Spiilruum ergänzt d Usstellig.

S Dorfmuseum stellt dr ländlig Alldaag um 1900 und s Räbbaumuseum d Bedütig vom Wiibau für s Dorf daar.

Litratuur

• Bernhard Graf und Stefan Hess: Spielzeugmuseum Riehen, Rieche 2010.

Lueg au

• Museum z Baasel

Weblingg

• Website vom Spiilzüügmuseum Rieche
• Museum im Wettsteinhaus riehener-jahrbuch.ch (1976)
• Luzia Knobel: Spielzeugmuseum, Dorf- und Rebbaumuseum. In: Gemeinde Lexikon Riehen

Fuessnoote

47.5841147.649406

Dä Artikel basiert uff ere fräie Übersetzig vum Artikel „Spielzeugmuseum,_Dorf-_und_Rebbaumuseum“ vu de dütsche Wikipedia. E Liste vu de Autore un Versione isch do z finde.