S Summerkasino

Us der alemannische Wikipedia, der freie Dialäkt-Enzyklopedy


S Summerkasino z Basel
Dialäkt: Baseldütsch

S Summerkasino (abkürzt Soca) isch en ehemooligs Gsellschaftshuus us em 19. Joorhundert und hüte e Jugendkulturzentrum in dr Stadt Basel. Es befindet sich im Dalbekwardier und ghöört zu de Baasler Kulturgüeter.

S Summerkasino isch s Resultat von ere brivate Iniziative gsi und isch um 1822 usserhalb vo de Stadtmuure für die Bürger baut worde, wo sich wäärend em Summer uf iiri Landsitz zruggzooge häi. Zu dere Zit isch au in dr Innestadt am Barfüesserblatz s hütige Stadtcasino baut worde. Wäärend de Unrueje vo de Basler Kantonsdrennig zwüsche 1830 und 1833 si d Mitgliider vom Summerkasino vorübergehend in s Stadtkasino züüglet; und denn wil d Summerkasino-Gsellschaft in de Joorzäänt druf immer diefer in d Schulde grutscht isch, wäärend s Stadtkasino ufblüet isch, häi schliesslig 1907 die bäide Gsellschafte fusioniert. Die riisige Schulde vom Summerkasino het mä aber nit chönne bewältige, und so isch s Summerkasino samt em Park 1937 verchauft worde.

Was dernoch im Summerkasino abgange isch wird vilmol vergässe. Im Joor 1938 isch es vom Kanton dr Israelitische Fürsorg zur Verfüegig gstellt worde. Es isch e Uffanglager für Flüchtling vom 2. Wältkrieg worde. D Mensche händ dert Unterkunft und Ässe beko. Si händ Ziit beko sich um e Witerräis z kümmere und händ ame au im Huushalt miese hälfe. Abem Joor 1940 sind si denn in dr Umgäbig in Arbetslager versezt worde[1] und 1946 isch s Summerkasino zuedo und wider am Kanton zruggeh worde.

1959 het d Stifdig Juugendhuus s Geböid übernoo und us em e Juugendhuus gmacht in de Joorzäänt druf. Sit 1986 isch s Summerkasino s grösste Juugendkultuurhuus in dr Regioon Basel und isch hüte e feste Bestanddäil in dr regionaale Juugendkultuur. D Dräägerschaft isch dr Veräin Basler Freizitakzioon BFA. S Huus wird für Konzärt und Partys brucht. E Hufe vo de Rüüm wärde an Juugendkultuurschaffendi us dr Regioon vermietet. Charakteristisch für s Geböid si d Graffiti, wo s uf dr ganze Fassade het.

Weblingg[ändere | Quälltäxt bearbeite]

Fuessnoote[ändere | Quälltäxt bearbeite]

  1. Factsheet vom Schwizerische Israelitische Gmäindibund, abgrüeft Merz 2013
Dä Artikel basiert uff ere fräie Übersetzig vum Artikel „Sommercasino“ vu de dütsche Wikipedia. E Liste vu de Autore un Versione isch do z finde.

Koordinate: 47° 32′ 50,5″ N, 7° 35′ 54,5″ O; CH1903: 612033 / 266307