Sigmar Gabriel

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
dr Sigmar Gabriel (2015)

Dr Sigmar Gabriel (* 12. Septämber 1959 z Goslar) isch e dytsche Bolitiker (SPD). Vu Dezämber 2013 bis Merz 2018 isch er Vizechanzler un vu Jänner 2017 bis Merz 2018 Bundesminischter vum Uuswärtige gsii. Dervor isch er vu Dezämber 2013 bis Jänner 2017 Bundesminischter fir Wirtschaft un Energy gsii. Vu 2009 bis 2017 isch er SPD-Barteivorsitzer gsii.

Härchumft un Familie[ändere | Quälltäxt bearbeite]

Dr Gabriel isch as zwait Chind vum Kommunalbeamte Walter Gabriel (1921–2012) un dr Chrankeschweschter Antonie Gabriel z Goslar uf d Wält chuu. D Eltere hän si drännt, wun er drei Johr alt gsii isch.[1]Em sy elteri Schweschter Gudrun isch bi dr Mueter blibe, är isch gege sy Wille in dr erschte zeh Johr bi sym Vater un syre Großmueter in ere Wohnsidlig z Goslar-Jürgenohl ufgwachse.[2][3] Anne 1969 het sy Mueter noch ere mehjehrige juristischen Ussenandersetzig s Sorgerächt iberchuu un dr Gabriel isch zuen ere zoge. Mit 18 Johr het dr Gabriel erfahren, ass sy Vater au in dr Noochriegszyt en iberzygte Nationalsozialischt bliben isch. Dr Gabriel isch evangelisch un syt 2012 in zwooter Eh ghyrote mit dr Zahnärzti Anke Gabriel geb. Stadler vu Magdeburg.[4][5] Si läbe zämme z Goslar. In erschter Eh isch er mit dr Munise Demirel ghyrote gsii. Är het er e Doochter (Saskia, * 1989)[1][6] un mit syre jetzige Frau ne zwooti Doochter (Marie, * 2012)[7].

Studium un Beruef[ändere | Quälltäxt bearbeite]

Am Ratsgymnasium Goslar het er anne 1979 s Abitur gmacht. Vu 1979 bis 1981 het dr Gabriel as Zytsoldat (SaZ 2) in ere Luftwafferadarainhait vu dr Bundeswehr z Goslar un z Faßberg dient (letschte Dienschtgrad Obergefreiter). Ab em Summersemeschter 1982 het dr Gabriel an dr Georg-August-Universität Göttingen Germanischtik, Bolitik un Soziologi studiert. Anne 1987 het er s erscht Staatsexame fir s Lehramt an Gymnasie (Sekundarstapfle II) absolviert. In syre Studiezyt het dr Gabriel näbehär as Nachtportier in eme Göttinger Hotel un bim Dytsche Gwerkschaftsbund (DGB) gschafft. Ab em Schueljohr 1987/88 isch dr Gabriel Studiereferendar am Christian-von-Dohm-Gymnasium z Goslar gsii. Sy Referendariat het er anne 1989 mit em zwaite Staatsexamen abgschlosse

Im Schueljohr 1989/90 het er in dr Erwachsenebildig as Beruefsschuellehrer bim Bildigswärch vu dr Nidersächsische Volkshochschuele (BNVHS GmbH) z Goslar gschafft.

Dr Gabriel isch Mitglid vum Netzwärch Atlantik-Brugg[8] un im Kuratorium vu dr Stiftig „Schüler Helfen Leben“.[3][9]

Bolitik[ändere | Quälltäxt bearbeite]

SPD-Jugendfunktionär (1976 bis 1989)[ändere | Quälltäxt bearbeite]

Dr Gabriel isch anne 1977 as Gymnasiascht in d SPD yydrätte. Vu 1976 bis 1989 isch er im SPD-noche Jugendverband Sozialistische Jugend Deutschlands – Die Falken (SJD) aktiv gsii. Churz no sym Yydritt in dr Jugendverband isch er Vorsitzer vum Ortsverband Goslar wore. Bal derno isch er zum Mitglid vum Braunschweiger Bezirksvorstand gwehlt wore, zerscht as Referänt fir antimilitaristischi Arbet, speter as SJD-Ringlaiter un schließlig as Bezirksvorsitzer. As Verdrätter vum Bezirk Braunschweig, wu em marxistische Fligel zuegrächnet woren isch, het er e Zyt lang em Bundesvorstand vu dr SJD – Die Falken aaghert.[10]

Kommunal- un Landesbolitik z Nidersachse (1987 bis 2005)[ändere | Quälltäxt bearbeite]

Sy bolitisch Karriere het in dr Kommunalbolitik vu syre Haimetstadt Goslar aagfange: Vu 1987 bis 1998 isch dr Gabriel Mitglid vum Chraisdag vum Landchrais Goslar un vu 1991 bis 1999 Rotsherr vu dr Stadt Goslar gsii. Vu 1990 bis 2005 isch er Mitglid vum Nidersächsische Landdag gsii. Vu 1997 bis 1998 isch er stellverdrättende Vorsitzer vu dr SPD-Landdagsfraktion gsii, vu 1998 bis 1999 un vu 2003 bis 2005 ihre Vorsitzer gsii. Vu 1999 bis 2005 het dr Gabriel em SPD-Barteivorstand aaghert.

Am 15. Dezämber 1999 het dr Gabriel s Amt vum Nidersächsische Minischterbresidänt ibernuu un isch dodermit dr dritt Regierigschef in aire Legislaturperiod gsii. Sy Vorgänger Gerhard Glogowski isch am 28. Oktober 1998 noch em Gerhard Schröder chuu, wu dää in s Amt vum Bundeschanzler gwächslet isch. Dr Glogowski isch churz derno mit Affärevorwirf konfrontiert woren un isch zruggdrätte. Bi dr Landdagswahl am 2. Februar 2003 het d SPD unter em Gabriel gege d CDU unter dr Fierig vum Christian Wulff mit 33,4 % (-14,5 Brozäntpinkt gegeniber 1998; CDU: 48,3 %, +12,4 Brozäntpinkt) verlore.

Vu 2003 bis 2005 isch dr Gabriel stellverdrättende Vorsitzer vum SPD-Landesverband Nidersachse gsii, vu 2003 bis 2009[11][12] Vorsitzer vum SPD-Bezirk Braunschweig. Derzu het dr Gabriel noch em Uusschyden us em Amt vum Minischterbresidänt vu 2003 bis 2005 s neigschaffe Amt vum Beufdraite fir Popkultur un Popdiskurs vu dr SPD (churz Popbeufdraite), was em in Aalähnig an dr Sänger Iggy Pop dr Spitzname Siggi Pop yybrocht ghaa het.[13] Näbe syre Arbet as Fraktionsvorsitzer im Landdag het dr Gabriel in däre Zyt au bi dr Firma Communication Network Service GbR (CoNeS) as Beroter an eme Ufdrag vu dr Volkswagen AG zue dr europäische Induschtribolitik gschafft.

SPD-Bundesdagsabgordnete (syt 2005)[ändere | Quälltäxt bearbeite]

Bi dr Bundesdagswahl 2005 isch dr Sigmar Gabriel zum erschte Mol bin ere Bundesdagswahl aadrätten un het s Diräktmandat im Wahlchrais Salzgitter – Wolfenbüttel mit 52,3 % vu dr Erschtstimme gwunne. Syterhär het er sy Diräktmandat zwaimol erfolgrych chenne verdaidige (2009 mit 44,9 %, 2013 mit 46,6 %)[14].

Bundesumwältminischter (2005 bis 2009)[ändere | Quälltäxt bearbeite]

Vum 22. Novämber 2005 bis zum 27. Oktober 2009 isch dr Gabriel Bundesminischter fir Umwält, Naturschutz un Reaktorsicherhait gsii. In däre Funktion het er unter anderem s Verbot vu dr Gliebiire in dr EU aagstupft un duregsetzt.[15]

SPD-Vorsitzer (2009 bis 2017)[ändere | Quälltäxt bearbeite]

Am 5. Oktober 2009 isch dr Gabriel vum SPD-Barteivorstand mit 77,7 % fir s Amt vum Bundesvorsitzer nominiert wore.[16] Bi dr Wahl uf em SPD-Bundesbarteivag z Dresden am 13. Novämber 2009 het dr Gabriel 94,2 % vu dr Delegiertestimmen iberchuu. Uf em SPD-Barteidag im Dezämber 2011 isch dr Gabriel mit 91,6 % vu allne Delegiertestimme fir zwai Johr im Amt bstetigt wore[17]. Dur s zwaitschlächtscht Ergebnis vu dr SPD bin ere Bundesdagswahl anne het dr Gabriel syni baide gueten Ergebnis nit chenne widerhole un het uf em ordelige Bundesbarteidag 2013 z Leipzig mit 83,6 % e mäßig Ergebnis iberchuu.[18]

Vu 2009 bis 2012 isch dr Gabriel as Verdrätter vu dr SPD Vizebresidänt vu dr Sozialistische Internationale gsii.

Am 19. Merz 2017 isch dr Martin Schulz zue sym Noofolger as SPD-Vorsitzer gwehlt wore.

Bundesminischter fir Wirtschaft un Energy[ändere | Quälltäxt bearbeite]

Ab em 17. Dezämber 2013 isch dr Sigmar Gabriel Bundesminischter fir Wirtschaft un Energy gsii. Derzue isch er syterhär au Vizechanzler vu dr Bundesrepublik Dytschland.

Bundesusseminischter[ändere | Quälltäxt bearbeite]

Am 27. Jänner 2017 isch dr Gabriel Bundesusseminischter as Noofolger vum Frank-Walter Steinmeier wore, wu sy Amt wäg dr Wahl zum Bundesbresidänt ufgee het. Mit dr Bildig vu dr neie Regierig im Merz 2018 is dr Gabriel us em Amt gschide.

Weblink[ändere | Quälltäxt bearbeite]

 Commons: Sigmar Gabriel – Sammlig vo Multimediadateie

Fueßnote[ändere | Quälltäxt bearbeite]

  1. 1,0 1,1 Siggi Peppone aus dem Harz. Constantin Magnis, Cicero, Dezämber 2009
  2. Lueg au SPD-Chef Sigmar Gabriel lässt kranken Vater allein. In: www.berliner-kurier.de. 2012
  3. 3,0 3,1 tis: SPD-Parteichef: Sigmar Gabriel spricht über Nazi-Vergangenheit seines Vaters. In: Zeit Online vum 9. Jänner 2013
  4. evangelisch.de über das Engagement evangelischer Christinnen und Christen in der SPD
  5. Spiegel Online: SPD-Chef im Glück – Sigmar Gabriel heiratet langjährige Lebensgefährtin, 17. August 2012
  6. RP Online: SPD-Chef wird Vater mit 52. 2012-02-04. Abgrüeft am 2012-02-26.
  7. „Heute früh ist unsere kleine Marie in Magdeburg zur Welt gekommen“, DerWesten, 10. April 2012
  8. Atlantikbrücke-Neuer Zoff im feinen Club? Manager-Magazin, 21. Jänner 2011
  9. Martin Jungfer: Sigmar Gabriel litt unter prügelndem Vater. Südkurier vum 10. Jänner 2013
  10. Sigmar Gabriel uf dr SPD-Syte
  11. Bericht in dr Hannoverschen Allgemeinen Zeitung, 31. Mai 2011
  12. Braunschweiger Zeitung: Gabriel soll Vorsitzender des SPD-Bezirks Braunschweig werden. 2003-02-04. Archiviert vom Original am 2012-01-18. Abgrüeft am 2013-12-17.
  13. Weltkrise privat. Wenn Siggi Pop rockt, Spiegel Online, 20. Oktober 2009.
  14. Gabriel nur auf Platz 24 der Landesliste Niedersachsen, Hannoversche Allgemeine
  15. Jochen Bittner: Ein Schlag auf die Birne. Die Zeit, 2009-09-04. Abgrüeft am 2012-09-11.
  16. Nur 77,7 Prozent für Gabriel, faz.net
  17. Focus: Parteitag in Berlin: Gabriel als SPD-Parteivorsitzender wiedergewählt
  18. Süddeutsche.de: SPD bestätigt Gabriel mit mäßigem Ergebnis
Information icon.svg Dä Artikel basiert uff ere fräie Übersetzig vu dere Version vum Artikel „Sigmar_Gabriel“ vu de dütsche Wikipedia.

E Liste vu de Autore un Versione isch do z finde.