Sichron Jaakow
| Sichron Jaakow | |||
| Basisdate | |||
|---|---|---|---|
| hebräisch: | זיכרון יעקב | ||
| Staat: |  Israel
| ||
| Bezirk: | Haifa | ||
| Koordinate: | 32° 34′ N, 34° 57′ O | ||
| Höchi: | 70 m | ||
| Flechi: | 32,129 km² | ||
| Iiwohner: | 17.800 (2007) | ||
| Bevölkerigsdichti: | 554 Iiwohner pro km² | ||
| Art vo dr Gmeind: | Lokalverband | ||
| Webpresänz: | |||
| |||
Sichron Jaakow (hebräisch זיכרון יעקב – es git alli mööglige Umschrifte wie Zikhron Ya'akov (änglisch), Zichron Ja’akow (dütsch) usw.) isch e Lokalverband im israelische Bezirk Haifa am süüdlige Ändi vom Karmelgebirg. Im Joor 2007 het er 17'800 Iiwooner gha.
D Stadt isch 1882 vo jüüdischen Iiwanderer mit dr Understützig vom Baron Edmond de Rothschild as Moschawa gründet worde. Dr Naame vo dr Stadt („Erinnerig an Jakob“) isch im Rothschild sim Vater, Jakob Rothschild, z Eere gweelt worde.
Dr Baron Rothschild het in de erste Joor noch dr Gründig vom Ort Wiirääbe lo aapflanze und e Wiiguet lo baue. D Middelmeerküste isch ganz nooch und dört het mä am Blatz, wo hüte s Kibbuz Nachscholim isch, e Fläschefabrik baut. No hüte het dr grösst Wiibroduzänt vo Israel, „Carmel“, wo uf die Gründig zrugggoot, z Sichron Jaakow äine vo sine Hauptsitz.
Im August 1903 isch im Verwaltigsgeböid vo dr J. C. A. z Sichron Jaakow die ersti Knessia zämmedräte. Das isch e churzlääbigi Verdrätig vom Jischuw gsi und isch vom Ussischkin gl'itet worde. E baar Möönet spööter het sich die Veräinigung wider ufglööst, wil si dr Herzl abgleent het.
Äini vo de Seenswürdigkäite vo Sichron Jaakow isch Ramat haNadiv (d „Hüüchi vom Wooldääter“). Dört befindet sich in ere Parkaalaag s Graab vom Rothschild und sinere Fra. Iiri Überräscht si us us Frankriich dört aane brocht und am 6. April 1954 begraabe worde.
In dr Stadt befindet sich au s christlige Kibbuz Beth-El, wo vor allem Bunkerbelüftige und -filter härstellt. Es isch noch de kommunale Instituzioone dr zwäitgrösst Arbetgääber in dr Region mit öbbe 600 israelische Arbäiter, wo nit Däil vom Kibbuz si, und fast 400 us em Kibbuz sälber. Beth-El het no Standort z Binjamina, Shahak, Magen Shaul und Bnei Yehuda.
Persönligkäite
[ändere | Quälltäxt bearbeite]- Sarah Aaronsohn (1890–1917), e jüüdischi Spionin im Erste Wältchrieg gege s Osmanische Riich
Weblingg
[ändere | Quälltäxt bearbeite]
Commons: Zichron Ja’akow – Sammlig vo Multimediadateie
|
Dä Artikel basiert uff ere fräie Übersetzig vum Artikel „Zichron_Ja'akow“ vu de dütsche Wikipedia. E Liste vu de Autore un Versione isch do z finde. |