Schwiizer Heimetschutz

Dr Schwiizer Heimetschutz (abgchürzt: SHS) isch ane 1905 under em Name Schweizerische Vereinigung für Heimatschutz gründet worde.

sis Zyl

Dr Verein luegt für d Boukultuur und di gueti Architektuur i dr Schwiiz. Är hed öppe 17'000 Mitglieder. I jedem Schwiizer Kantoon git’s en eigeti Sekzioon vom Heimetschutz.

Es goot em SHS trum, wärtvolli Bouwärch us alne Zyte z schütze und für d Zuekumpft z erhalte. Au hüt, wo d Kantöön Dänkmolpfleeger händ, isch d Arbet vom Heimetschutz no nöötig. Är seit dr Bevölkerig uf anderen Wääg, was für wärtvolli Bouwärch im Land z gsee sind, prichtet drüber mid sine Schrifte und erinneret dra mid dr Schoggidaalerakzioon, wo n er sid em 1946i jedes Joor macht.

Expärte vom Heimetschutz hälfe mid, wenn alti guete Gebäud umbout wärde. Und dr Verein hilft, dass politische Vorlage und Gsetz, wo d Architektuur beträffe, besser usechöme.

Uuszeichnige, wo der Heimetschutz git

Jedes Joor tuet der Heimetschutz sini spezielli Uuszeichnig, dr Wakkerpryys, ere Schwiizer Gmeind überggä, wo guet zu irere Architektur luegt.
Dr Heimatschutzpryys git’s für privati Organisazioone.
Und sid am 1998i chunt dr Schulthess-Gartepryys jewylen öpperem z guet, wo sech für Grüenzoone und Gärte igsetzt het.

Rooti Lischte

Wil au no witer söttigi Hüüser, wo für d Architektuurgschicht äigentlech wärtvoll sind, kabutt gmacht wärde und für immer us dr Kulturlandschaft verschwinde, schribt der Heimetschutz die bedüütendschte drvo uf ene Lischte, so dass me se wenn mögli doch no chönnt erhalte. Das Verzeichnis schtoot im Internet.

Literatur

Madlaina Bundi: Chronik 100 Jahre Schweizer Heimatschutz, Schweizer Heimatschutz, 2004. Online (PDF; 493 kB)
Stefan Bachmann: Heimatschutz. In: Historisches Lexikon vo dr Schwiiz.

Weblink

Commons: Schweizer Heimatschutz – Sammlig vo Multimediadateie

d Website vom Schwiizer Heimatschutz (heimatschutz.ch)
Rooti Lischde vo de bsunders gföördete guete Gebäude (roteliste.ch)