Schwiizer Alpeklub

Schweizer Alpen-Club SAC; (SAC)
Zwäck	Bärgsportverband
Sitz	Bärn
Grindig	1863
Mitglider	145'000 (2014)
Website	http://www.sac-cas.ch/

Dr Schwiizer Alpeklub SAC (uf französisch Club Alpin Suisse CAS, uf iteliänisch Club Alpino Svizzero CAS und uf rätoromanisch Club Alpin Svizzer CAS) isch e Verein vo dr Schwiiz.

Dr Verein isch ane 1863 ggründet worde, zum de Schwiizer Alpinischte au eso ne Organisazioon z ggä wie se d Ängländer scho lengeri Zyt gha hend. Nach de früene Naturforscher und de änglische Bärgstyger, wo grossi Tuure i de Alpe gmacht hend, sind au Lüüt us dr Schwiiz immer meh z Bärg ggange.

D Froue hend am Afang nit törfe em SAC byträtte; drum hend es baar Bärgstygerinne ane 1918 dr Schwiizerisch Frouealpeklub uf d Bei gstellt. Erscht ane 1980 sind dr SAC und dr SFAC zämeggange.

Gly nach dr Gründig ane 1863 hend d Mitglider vom SAC i de verschidene Regioone vo dr Schwiiz eigeni Gruppe pildet, wo als Sekzioone vom SAC gälte. Middlerwyle sind’s 111 Sekzioone. Die gröscht isch d Sekzion UTO vo Züri.^[1]

D Hollandiahütte vom SAC liit i de Bärner Alpe.

Als Underkümpft für die länge Tuure uf d Bärggipfel hend d Sekzioone Bärghütte bout. Die erschti isch d Grüenhornhütte im Glarnerland gsi. Em SAC und syne Deilverein ghöre 152 Hütte i alne Bärggebiet vo dr Schwiiz, au im Jura.

Dr SAC organisiert d Usbildig vo de Bärgstyger, bsunders au für Jugentlechi. Er luegt zum Sportchlättere und hilft bi Chlätterweppewärb mit, und er isch zäme mit dr Schwizerische Rettigsflugwacht für d Bärgrettig zueständig, grad au bi Unfäll mit Lawine.

Dr SAC het e grossi Biblioteek mit Bärgliteratur; die isch i dr Zäntralbiblioteek Züri dehei.

Zum bi de Schutzprojäkt für d Alpe mitzmache, isch dr SAC dr Internazionale Alpeschutzkommission CIPRA byträtte.