Schwaanesee

Us der alemannische Wikipedia, der freie Dialäkt-Enzyklopedy
D Olga Preobrajenska as d Odette in dr Uffüerig am Mariinski-Theater 1895

Dr Schwaanesee (russisch Лебединое Озеро, Lebedinoje osero) isch äins vo de berüemtiste Ballett zur Muusig vom Pjotr Iljitsch Tschaikowski. Es ghöört zum Standardrepertuar vo klassische Ballettkompanie. Bsundrigs s Allegro Moderato us de Dänz vo de Schwään im 2. Akt isch in dr Choreografii vom Lew Iwanow zum Geegestand von e Hufe Parodie worde und isch doorum as dr Danz vo de vier chliine Schwään wit über s Publikum, wo sich für Ballett intressiert, uuse bekannt.

D Motiv[ändere | Quälltäxt bearbeite]

S Libretto isch vom Wladimir Petrowitsch Begitschew, isch aber hüfig nöi gschriibe und abgänderet worde, so dass es Wersioone git, wo s Ändi seer underschiidlig cha si. D Saag vo dr verwunschene Schwaanebrinzässin, wo nume dur die woori Liebi cha erlööst wärde, isch bin e Hufe Völker bekannt.

Im Schwaanesee chömme e Hufe Motiv us verschidnige Määrli vor, bsundrigs das vo dr unglücklige verzauberete Prinzässin, wo dur d Liebi vom ene Brinz erlöst wird. Au s unglücklige Ändi vom ursprünglige Libretto isch s bekannte Määrlimotiv vom Schwaanemäitli oder au dr Schwaanejungfrau.

S Baasler Ballettwunder[ändere | Quälltäxt bearbeite]

Mit dr Uffüerig vom «Schwaanesee» am Baasler Stadttheater si dr Ballettmäister Waclaw Orlikowsky und d Ballettdrubbe vom Stadttheater in ganz Öiropa bekannt worde. Das isch dr Aafang vom sogenannte Baasler Ballettwunder gsi, wo dr Orlikowsky mit witere bedütende Choreografie zää Joorlang witergfüert het.

Litratuur[ändere | Quälltäxt bearbeite]

  • Thomas Kohlhase: Schwanensee in: Einführung in ausgewählte Werke Petr Il'ič Čajkovskijs, Schott, Mainz 1996, S. 13–31, ISBN 3-7957-0324-7 (= Čajkovskij-Studien, Band 2).

Weblingg[ändere | Quälltäxt bearbeite]

 Commons: Schwaanesee – Sammlig vo Multimediadateie
Noote
  • Schwanensee: Note im International Music Score Library Project.
Bilder (JPEG)
Dä Artikel basiert uff ere fräie Übersetzig vum Artikel „Schwanensee“ vu de dütsche Wikipedia. E Liste vu de Autore un Versione isch do z finde.