Schloss Ebnet

S Schloss Ebnet isch e barock Herrehuus im Fryybeger Stadtdail Ebnet.

Gschicht

Scho anne 1113 het s Chloschter St. Peter dur e Gieterdusch vum Herzog Berthold vu Zäärige Bsitz z Ebnet iberchuu. Anne 1348 wird e Ritter Snewlin-Landeck, us dr yyflussryyche Brysgauer Familie Schnewlin, as Herr uf Ebnet gnännt.^[1]

Ebnet isch anne 1568 dur d Hochzyt vu dr Anna vu Landeck, dr letschte Verdrätteri vu dr Schnewlin-Landeck, in dr Bsitz vu dr Freiherre vu Sickinge, eme fränkische Adelsgschlächt, chuu. Si hän z Ebnet anne 1696 e Schloss böue loo un hän s as Summerresidänz bruucht. Ihre Stadtpalais z Fryybeg isch hite dr Sitz vum Landgricht. D Grundherrschaft vu dr Freiherre isch 1804 mit em Brysgau em Baadische Staat iberdrait wore, aus s Schloss hän d Sickinger an Baade verchauft. S Großherzogtum het s e Joor speeter^[1] wyterverchauft an d Freiherre vu Gayling von Altheim, wu hite no din woone.

S Schloss isch ab 1748 im Ufdrag vum Freiherr Ferdinand Sebastian von Sickingen-Hohenberg no me Entwurf vum Architäkt Johann Jacob Fechter vu Baasel böue wore, wel dr Vorgängerböu nim dr Aasprich vum Böuherr entsproche ghaa het. Fir di chinschtlerisch Uusgstaltig sin großi Barockchinschtler vu dr Region härzoge wore, vor allenm dr Christian Wentzinger, wu di meeschte Sandstaiplaschtike im Schlosspark gstaltet het, wu d Orginal dervu mittlerwyli im Stadtmuseum stehn. D Stuckature in dr 14 Ryym vum Schloss stamme vum Wessobrunner Hans Georg Gigl, di ryych verzierte Stuckmaske im Gaartesaal vum Wentzinger. D Deckegmelde, vor allem vum Gaartesaal un vum brächtige Stäägenufgang stamme vum Allgaier Benedikt Gambs.

Im Zweete Wältchrieg isch s Schloss nit bumbardiert wore. D Sprängig vu dr Eschbachbruck vor em Schloss dur dr Volkssturm het aber großi Schääde aagriichtet. Zaalryychi Fänschter un Dail vum Dach sin z Bruch gange. Am schlimmschte het s s Deckegmelde im Gaartesaal, wu spetter wider reschtauriert woren isch,.

Im Schloss un dr Nääbegebei sin im Chrieg bis zue 100 Flichtlig us em Ruhrgebiet, vu Ludwigshafen, aber au vu dr Fryybeg un dr Region unterbroocht gsii. Au dr speeter Kultusminischter vu Bayern, dr Hans Maier, het d Bumbenaacht vum 27. Novämber 1944 im Ebneter Schlosschäller verbroocht. Di letschte Flichtlig hän erscht anne 1950/51 s Aawääse verloo.

D Chuchi isch urspringlig im Chällergschoss gsii un isch erscht 1958 in s Äärdgschoss verlait wore.

S Schloss isch in dr 1980er-Johr umfassend reschtauriert wore. Im Schlosspark isch an Stell vun ere Remise dr Theodor-Egel-Saal böue wore, wu jetz as Proberuum fir dr Fryybeger Bachchor dient. Hite isch s Schloss nume zue bsundere kulturälle Veraastaltige wie zum Ebneter Kultursummer oder am Daag vum uffige Dänkmool fir d Effetligkait zuegänglig.

Böu

D Hauptfassade cheert sich em Gaarte zue. E vorgschoobene Mittelgiibel isch mit em brächtige Woppe vu dr Familie gschmickt un wird dur dr Balkon un di doppellaifig Freistääge no betoont.

Literatur

Paul-René Zander: Das Rokokoschloß Ebnet bei Freiburg i. Br. Schnell Kunstführer Nr. 2256, Regensburg 1997
Silvia Huth, Manfred Frust: Schlösser am Oberrhein, S. 126 ff., 2008 ISBN 978-3-87407-793-4

Fueßnote

↑ ^1,0 ^1,1 Franz Xaver Kraus: Die Kunstdenkmäler des Grossherzogthums Baden. Band 6. Jacob Christian Benjamin Mohr, Tübingen und Leipzig 1904.

Weblink

Commons: Schloss Ebnet – Sammlig vo Multimediadateie

Schloss Ebnet bei Freiburg Br., Visualisierig vum Böuzuestand mit Schlosspark im 18. Joorhundert.
Offiziälli Websyte Schloss Ebnet

47.9872222222227.9016666666667Koordinate: 47° 59′ 14″ N, 7° 54′ 6″ O

Dä Artikel basiert uff ere fräie Übersetzig vum Artikel „Schloss_Ebnet“ vu de dütsche Wikipedia. E Liste vu de Autore un Versione isch do z finde.

[kraus-1] 1,0 ^1,1 Franz Xaver Kraus: Die Kunstdenkmäler des Grossherzogthums Baden. Band 6. Jacob Christian Benjamin Mohr, Tübingen und Leipzig 1904.

[1]