Sales Huber

Us der alemannische Wikipedia, der freie Dialäkt-Enzyklopedy

De Sales Huber (11. Juli 1920 bis 1. September 2004) isch e sanggaller Lehrer, Autoor und Komponist gsii. Gschrebe hett er uf Hoochtütsch und Sanggallertütsch. Er isch de Verfasser vom Teggscht vom Sant Galler-Lied. 1996 hett er de Anerkennigspriis vom Kantoo Sanggale öberchoo.[1]

Lebe ond Werch[ändere | Quälltäxt bearbeite]

De Sales Hueber isch em 11. Juli 1920 uf d Welt choo. Noch sinnere Uusbildig zom Lehrer hett er vo 1943 bis 1946 im Oberrindl underrichtet und isch drofabe Lehrer z Wittebach wore, woner bis zo sim Tood em 1. September 2004 glebt hett. Er hett sich starch för s kulturelli Lebe iigsetzt. 1953 hett er zom 150 jöörig Jubiläum vom Kantoo Sanggale de Teggscht vom Sant Galler-Lied gschrebe, d Melodii dezue hett de Floowiiller Walter Schmid (1906-1983) komponiert. De Sales Hueber hett aber o selber Musigstugg komponiert, under anderem för ostschwitzer Dörfer, wenn si e Jubiläum z fiire ghaa hend, so ane 1964 s Gääwilerlied und s Joor drufabe 1965 s Bichwilerlied. Er hett aber o gaistlichi Musig komponiert. Siis Lebe lang hett er sich för di musikaalischi Bildig fo de Chind iigsetzt. Von em stamed o e paar Theaterstugg. Denebet hett er sich ono för Haimetgschicht interessiert und verschidnigi Abhandlige dröber gschrebe, drunder di Chlii Chronik vo Wittebach. Zodem hett er ane 1964 s Ortsmuseum vo Wittebach gründet. Si Soo isch de Sales Hueber (1948-2021), wo z Niderhelffetschwiil und im Floowiller Spitool Arzt gsii isch und wo z Tansania e Spitool uuftue hett.

Werch (Uuswaal)[ändere | Quälltäxt bearbeite]

  • Sant Galler-Lied: Sanggalle isch mis Heimatland, 1953, mit de Musig vom Walter Schmid.
  • Dr ewig Gähwiler, 1964 e Festspiili zom Jubiläum vom Dorf Gähwiil.
  • D Bömm wachsed nöd in Himel! 1969, e zwaitailigs Buurespiil.
  • Di alt und di neu Zit. 1969 e Buurespiili för zwoo Gruppe.
  • Ales weg em Frauestimmrecht. 1970, e lostigs Spiili för fööf Lütt.
  • Appezöllerlendli du. E paar Gschichtsbletter zom 900. Geburtstag vo Appezöll. 1971.
  • Deutsche Jugendmesse, 1974, för e Jugedchoor und Oorgle. D Musig isch vom P. Schmalz.
  • Kleine Chronik der Gemeinde Wittenbach, 1976, zäme mettem Heinrich Benz.
  • Bilder os de Vergangeheit, 1982 e Festspiili zom 100-Joor Jubiläum vo de Pfarrai Spiicher-Troge-Wald.
  • Memento Mori. Sterbeandenken und Totenbrauchtum. 1984.
  • Bilder aus Lenggenwils Vergangenheit, 1988, e Festspiili

Literatur[ändere | Quälltäxt bearbeite]

  • Lutz Hagestedt: Deutsches Literatur-Lexikon. Das 20. Jahrhundert, 21. Band: Huber - Imgrund. De Gruyter 2014. ISBN: 978-3-11-023167-0. Lemma: Huber, Sales, s.28f.

Fuessnote[ändere | Quälltäxt bearbeite]

  1. Sales Huber uf kulturstiftung.sg