Söldner im Byzantinische Riich

Us der alemannische Wikipedia, der freie Dialäkt-Enzyklopedy

Es het scho sit em 4. Joorhundert Nidrömer gee, wo as Söldner in dr oströmische und denn byzantinische Armee dient häi[1]. Die kaiserligi Liibwach, d hetaireia, het nume us Barbare bestande, um 900 näbe Chasare und Araber au Franke und Waräger. As Usländer si si weniger in innerbyzantinischi Machtkämpf verwigglet gsi und häi au käi Chansse gha, sälber dr Droon z bestiige. Dr byzantinisch Universalgleerti Michael Psellos het beschriibe, wie sich dr Geegekaiser Isaak Komnenos 1057 von ere Liibwach us Italier, vermuetlig romanisierti Normanne, und Taurosküte het lo beschütze. Iiri Bewaffnig het us lange Lanze und Stritäxt bestande.

Mä nimmt aa, ass vom 11. Joorhundert aa d Theme, wo sich uf en Armee vo freije Buure gstützt häi, in ere Kriise befunde häi und mä dorum sich immer mee uf fremdi Söldner gstützt het. Au schiint s ass dr Konstantin X. (1059-1067) Angst vor Möitereie vo de reguläre Soldate ghaa het und dorum die Stehendi Armee verchliineret het. Dr grösst Däil vo dr Armee het in dr Middi vom 11. Joorhundert us Söldner bestande.[2] Ass s Riich so abhängig gsi isch vo usländische Soldate het sich in dr Schlacht vo Manzikert 1171 gräächt, wo grad wo d Schlacht aagfange het, die kumanische Söldner zum Alp Arslan desertiert häi.

Fuessnoote[ändere | Quälltäxt bearbeite]

  1. Jonathan Shepard: The uses of the Franks in eleventh-century Byzantium. Anglo-Norman Studies 1993, 278
  2. Steven Runciman, Geschichte der Kreuzzüge (Münche, Beck 1978) S. 62
Dä Artikel basiert uff ere fräie Übersetzig vum Artikel „Söldner_(Byzanz)“ vu de dütsche Wikipedia. E Liste vu de Autore un Versione isch do z finde.