Rudolf Sandreuter

Us der alemannische Wikipedia, der freie Dialäkt-Enzyklopedy
Dialäkt: Baseldütsch

Dr Rudolf Sandreuter (* 1868, † 1926) isch e Baasler Archidekt gsi.

Lääbe und Wärk[ändere | Quälltäxt bearbeite]

Dr Rudolf Sandreuter het si Karrieere as sälbständge Archdekt mit 31 aagfange. Am Aafang het er mit em Wilhelm H. Fichter-Liebi zämmegschafft und z Baasel Äifamiliehüüser im barocke, klassizistische und spootgootische Stiil baut. Iir letschts gmäinsaams Wärk isch 1899 e Gschäfts- und Woonhuus in dr Spaale gsi. S Bardeer isch us Granit, die oobere drei Stöck us gäälem Sandstäi baut. D Fänster im Bardeer si Rundboogefänster

In däm Joor isch au die nöi Müüli vo dr Aktienmühle Basel AG in Bedriib gnoo worde. Das isch äini vo de erste groosse Brodukzioonsaalaage im Klybeck gsi mit ere äigene Dampfdurbiine und eme Aaschlussgläis an die Groossherzoogligi Baadischi Baan.[1]

1904 isch dr vierstöckig Chopfbau am Fischmäärt zwüsche dr Määrtgass und dr Stadthuusgass fertig worde, wo d Aasicht an dr Süüdsite vom Blatz mit sinere Juugedstiilfassaade us rootem Sandstäi und sim riisige Atelieefänster im Dachstock brägt. Im Bardeer isch d Siidehandlig Hoch iigmietet gsi und im Ateliee dr Fotigraf Alfred Kugler.[2]

1912 het dr Sandreuter s Silo für d Baasler Laagerhuusgsellschaft (BLG) baut, wo äine vo de ganz früeje Iisebetonbaute z Baasel isch. Er isch e wichdige Laagerblatz für Geträid und Gaggoboone uf em Gländ vom dütsche Güeterbaanhof gsi. D Stifdig Habitat het s Silo welle erhalte und het s im Joor 2020 vom Harry Gugger zum e Hostel lo umbaue. [3]

Dr Wirt vom Gifthüttli het si alti Bäiz an dr Schniidergass für 48′000 Franke im Staat verchauft, won e Stroossekorrektuur het welle usfüere. 1913 het dr Sandreuter dr Ufdraag überchoo, e Geböid mit eme Restorant «im altschwizerische Stiil» z baue.[4]

Liddratuur[ändere | Quälltäxt bearbeite]

  • Rose Marie Schulz-Rehberg: Architektur des Fin de Siècle. Bauen in Basel um 1900. Christof Meriaa Verlaag, Baasel 2012, S. 146.

Fuessnoote[ändere | Quälltäxt bearbeite]

  1. Stifdig Habitat: Aktienmühle, abgrüeft am 11/06/2022
  2. Martin Möhle vo dr Kantonaale Dänggmolpflääg Baasel: «Jugendstilhaus am Fischmarkt Basel», abgrüeft am 11/06/2022
  3. Silobasel: «Geschichte – 1912 entstand grosses im Erlenmatt Ost», abgrüeft am 11/06/2022
  4. «Wieso Gifthüttli?», abgrüeft am 11/06/2022