Rudolf-Günther Läpple
| Dialäkt: Schwäbisch |
Dr Rudolf-Günther Läpple (* 26. Okdobr 1928 z Heilbronn, † 9. Juli 2004) ischt a deitscher Kirchamusiker (Landeskirchamusikdirekdr, Kantor, Organischt) gwäa.
Aus seim Leaba
[ändere | Quälltäxt bearbeite]Dr Rudolf-Günther Läpple kommt em Johr 1928 z Heilbronn uff d Welt, wo-nr e-ma musikalischa Eldernhaus uffwechst. Drom isch’s et vrwonderlich, dass der Bua scho bald nôch seira Konfrmazioo vo dr Heilbronner Friidenskirch zom neabamtlicha Organischda bstellt wuud. Em Alder vo 16 Jôhr – dr Zwoide Weltkriag ischt em volla Gang – wuud’r vo de Nazionalsozialischda zom Kriagsdenscht vorpflichdet, zerscht als Luftwaffahelfer, nô zom Reichsarbeitsdenscht ond nô noh zo dr Wehrmacht. Deam schliaßt sich a franzeesischa Kriagsgfangaschaft ôô.
Wiidr zruck en dr Hoimet, bsuecht dr Läpple vo 1946 ôô drei Jôhr lang dui evangelisch kirchlicha Lehreroberschuel z Michlbach an dr Bilz, wo-nr mit-em Abidur abschliaßt. Hendrher belegt’r als Student s Fach Evangelischa Kirchamusik an dr Stuegerter Musikhochschuel. So ganz neabaher vorsiht’r noh d Uffgab vom Kantor ond Organischda en [[Göppingen[Gebbenga]]. 1952 kriagt’r sei erschda hauptamtlicha Stell als Kantor ond Organischt an dr Ludwigsburger Stadtkirch. Dô drmit vrbonda isch d Uffgab vom Bezirkskantor fir da ganza Kirchabezirk Ludwigsburg. Sei Arbet vrsiht’r deet zwanzg Jôhr lang mit-ra wahra Leidaschaft, was zor Folge hôt, dass sich d Kirchamusik z Ludwigsburg em Lauf dr Zeit zo-ra graußa Bliade entfalda kôô.
1971 beruaft dr Evangelische Obrkircharat da Läpple zom Gschäftsfihrer fir sei Amt fir Kirchamusik. Siiba Jôhr späder wudd’r Nôchfolger vom Hermann Stern als Landeskirchamusikdirekdr vo dr Evangelischa Landeskirch en Wirdaberg.
Am 9. Juli 2004 macht dr Läpple seine Auga fir emmer zua. 75 Jôhr send-em zom Leaba vorgennt gwäa.
Ehronga
[ändere | Quälltäxt bearbeite]- 1980 isch dr Läpple vom Landesbischof vo dr Evangelischa Landeskirch en Wirdaberg weaga seine Vordinscht uff-em Gebiit vo dr Kirchamusik zom Landeskirchamusikdirekdr ernannt wôrra.[1]
- 1988 ischt em Läpple vom dômôliga Bundespräsident Richard von Weizsäcker weaga seine außergewehnliche Leischdonga om d evangelischa Kirchamusik s Bundesvordinschtkreiz am Bande vorliha wôrra.[2]
Quell
[ändere | Quälltäxt bearbeite]- Siegfried Bauer: Württembergische Größen der Kirchenmusik, a Ardikel en dr Festschrift Landeskirchenmusikfest 2017, rausgäa vo de Württembergische Blätter für Kirchenmusik, Ausgab 3/2017, S. 64–73