Richard R. Ernst

dr Richard R. Ernst (ca. 1986)

dr Richard R. Ernst (ca. 1980)

Dr Richard Robert Ernst (* 14. Augschte 1933 z Winterthur; † 4. Juni 2021 au dert, haimberächtigt z Winterthur) isch e Schwyzer Chemiker gsii, wu anne 1991 dr Nobelbryys fir Chemy iberchuu het.

Lääbe un Wirke

Dr Richard R. Ernst isch e Suhn vum Robert Ernst gsii, eme Profässer fir Architäktur am Technikum Winterthur.

Är het vu 1952 bis 1956 an dr ETH Züri Chemy studiert un 1962 mit ere Dissertation bim Hans H. Günthard un em Hans Primas iber s Thema Kernresonanz-Spektroskopie mit stochastischen Hochfrequenzfeldern sy Doktorat in fisikalischer Chemy abgschlosse (Dr. sc. techn.). Vu 1962 bis 1968 het er bi dr Firma Varian Associates z Palo Alto, Kalifornie gforscht, wun er d NMR-Fourierspektroskopy, d Ruschentkopplig un anderi Methode entwicklet het. Anne 1968 isch er retuurchuu an d ETH Züri un het e Forschergruppe in NMR-Spektroskopy mit Schwärpunkt uf methodische Entwicklige in flissiger un feschter Fase ufböue. Vu 1968 bis 170 isch er Poschtdoktorand gsii, vu 1970 bis 1972 Assischtänzprofässer, vu 1972 bis 1976 usserordelige Profässer un syter 1976 schließli ordelige Profässer fir Fisikalischi Chemy an dr ETH Züri. Anne 1998 isch er emeritiert wore.

Dr Ernst het d Entwicklig vu dr medizinische Magnetresonanz-Tomografy stimuliert. Zäme mit em Kurt Wüthrich het er wichtigi Bydreg zue dr Entwicklig vu dr NMR-Strukturbstimmigsmethod vu Biopolymer in Lesig glaischtet. Fir syni Bydreg zue dr Entwicklig vu dr hochufgleste magnetische Chärnresonanz-Spektroskopy (NMR) het er anne 1991 dr Nobelbryys fir Chemy iberchuu.

Dr Richard R. Ernst isch unter anderem Mitglid vum Schwyzerische Wisseschaftsrot (2000–2002) gsii, vum Stiftigsrot vu dr Marcel-Benoist-Stiftig un vum Hochschuelrot vu dr Tächnische Universitet Minche.

Är het e Hufe anderi Ehrige iberchuu, dodrunter dr Wolf-Bryys (1991), dr Louisa-Gross-Horwitz-Bryys (1991) un dr Marcel-Benoist-Bryys (1986). Är isch Ehredokter vu dr ETH Lausanne, dr TU Minche, dr Universitet Züri, dr Universitet Antwerpen, dr Babeș-Bolyai-Universitet Cluj un dr Universitet Montpellier gsii. Är isch Miglid gsii vu dr US National Academy of Sciences, Foreign Member vu dr Royal Society, London, dr Dytsche Akademy vu dr Naturforscher Leopoldina, dr Russische Akademy vu dr Wisseschafte, dr Koreanischen Akademy vu dr Wisseschaft un Tächnology, dr Academia Europaea, dr American Academy of Arts and Sciences un Ehremitglid vu verschidene andere Gsellschafte. Syt 1998 vergit d Fachgruppe magnetischi Resonanzspektroskopy vu dr Gsellschaft vu Dytsche Chemiker all Johr e Bryys an Noowugswisseschftler*ne, w uno ihm gnännt isch.

Vu 1990 bis 1994 isch er Bresidänt vu dr Forschigskummission vu dr ETH Züri un ab 1989 Vizebresidänt vum Verwaltigsrot vu dr Spectrospin AG z Fällanden (ab 1998 Bruker AG).

Dr Richard Ernst het z Winterthur gläbt un isch ghyrote gsii mit dr Magdalena geb. Kielholz.

Literatur

• Thomas Fuchs: Richard R.Ernst. In: Historisches Lexikon vo dr Schwiiz.
• Richard Ernst im Munzinger-Archiv (Artikelaafang frei abruefbar)
• Richard R. Ernst: Nobelpreisträger aus Winterthur. Autobiografie in Zusammenarbeit mit Matthias Meili. Hier und Jetzt, Verlag für Kultur und Geschichte, Baden 2020, ISBN 978-3-03919-501-5.

Weblink

 Commons: Richard Ernst – Sammlig vo Multimediadateie

• Publikatione vo und über Richard R. Ernst im Katalog Helveticat vo der Schwiizerische Nationalbibliothek
• Persenligi Websyte vum Richard R. Ernst
• Richard R. Ernst uf dr Websyte vu dr ETH Züri
• Richard R. Ernst uf dr Websyte vu dr Nobelstiftig
• Informatione vu dr Nobelstiftig zue dr Pryysverleihig 1991 an Richard R. Ernst (änglisch)

Fueßnote

Dä Artikel basiert uff ere fräie Übersetzig vu dere Version vum Artikel „Richard_R._Ernst“ vu de dütsche Wikipedia. E Liste vu de Autore un Versione isch do z finde.