Regabogaschüssele

Dialäkt: Schwäbisch

Regenbogenschüsselchen
1999 bei Lieshout

Regabogaschüssele sen keltische Gold- ond Silbermünzen mo do gfonda werrad, mo Kelta gläbd hen.

Vrbroidong

Regabogaschüssele send en dr Geged vom heutiga Ungarn, en Österreich, en Süddeutschland z fenda, gfonda hod ma se abr au em Rhiiland. Gmachd hend se Boier, Vindeliker, Tektosagen, Helvetier ond d Rheingermanen en dr Zeid vo oogfähr 300 v. Chr. bis zua dr Zeitewend. Se hoisad au „Muschelstatere“.

Ausseha

Regabogaschüssele send kloine Schüssele mid ama Durmesser vo om 18.5 Millimedr ond am Gwichd vo 1,8 - 7,47 Gramm.aus 12- oder meh karätigem Gold. Drzua war Kupfer, Zinn ond Palladium dren. Es sen wia kloine, gwölbde Schüssele ohne a Schrifd drauf. Drfier sen se doils mid Muschdr vrzierd, wia Kugla, Ponkd, Krois odr Stera, abr au mid Vogelköpf odr Schlanga.

• 
  Ausbroidong vo de Kelta
• 
  Regabogaschüssele
  bei de Rheinkelta
• 
  Regabogaschüssele
  aus Wallersdorf em Niederbayrischa Archäologiemuseum
• 
  Regabogaschüssele
  Stieldorf (Siebengebirge)
• 
  Regabogaschüssele
  Deutsches Historisches Museum ( Berlin )

Fundort

Regabogaschüssele hod ma en Manching odr au 1990 bei Sontheim (350 Schüssele) gfonda.

Oine vo de erschde Fondschdella war Podmokl ond Nischburg em Böhmischa om 1771.

Fälschonga

Ofd send en Manching au Münza drbei, mo an Kupferkern ond a Feuervergoldung hen. Dia Fälscherei war scho domols ond s geid se au Heid no.

Nama

Regabogaschüssele hoisad so, weil se d Form vo ara Schüssel hend, ond ma se moischdens nach ama Rega, mo se budsd hod, auf de Feldr gfonda hod. No hend d Leid denkd, daß se d Reschd vo ama Regaboga wäred.

Guck au

• Liste vo de keltische Stämm
• Oppidum

Lidradur

• Ernst Heinrich Meier: Deutsche Sagen, Sitten und Gebräuche aus Schwaben Nr. 256 Sagen vom Regenbogen, Stuttgart 1852
• Franz Streber: Beschreibung der s. g. Regenbogen-Schüsselchen und Erklärungs-Versuch ihrer Typen. In: Über die sogenannten Regenbogen-Schüsselchen. Band 2. München 1862. 

Nedsadressa

 Commons: Regenbogenschüsselchen – Sammlig vo Multimediadateie

• Regenbogenschüsselchen mit Hirschkopfdarstellung: hochauflösendes Digitalisat im Kulturportal bavarikon