Pizol

wie men im Winter vo dr Wildseelücke zum Pizol übere cha luege

Dr Pizol – oder Piz Sol, wie men em früener gseit het – isch e Bärg i dr Schwiiz.

Er isch im Süüde vom Kanton Sanggalle. Übere Bärg goot d Gränze vo de Gmeinde Mels und Pfäfers.

Dr Bärgspitz isch uf 2844 Meter über Meer. Uf drü Syte laufe Kreete vom Gipfelturm wäg: gäge Norde d Lavtinahörner, im Südweschte dr Piltschinachamm und gägen Oschte d Hööchi, wo sech zu de Wildseehörner und de Zanaihörner ufdeilt. Em ganze Bärgmassiv a dr Südsyte seit men au «Graui Hörner».

Am Pizol isch zwüsche de Lavtinahörner und de Wildseehörner es hööchs, nid bsunders steils Tääli, wo uf dr Nordsyte dr Wildsee lyt und grad under em Pizolgipfel dr Pizolgletscher; däm syni Flechi isch jetz immer wie chlyner woorde, und im Herbscht 2019, wo nume non es ganz es munzigs Stückli under dr Felswand vom Pizolgipfel doo gsi isch, het men e truurigi Fyr gmacht zum Adänken a dä schöön chly Bärggletscher. Do drüber het sogar au BBC prichtet.

Ringsume Bärg liggen uf allne Syte stotzigi Tääler under de Kreete: im Weschte d Piltschina und d Gilbi, im Norde s Vermol, im Oschte s Valplona und Zanai und uf dr Südsyte s Tersol; das sind – so wie dr Bärgnamen au – alles uralti Fluernääme us dr Zyt, wo men i däm Piet no Romanisch gredt het.

D Pizolbärge sind für zum go wandere und schyfaare und für Schytuure guet ygrichtet. Sit 1954 het’s chlyni Bärgbaane vo Wangs und Bad Ragaz uus ufe Mugger Chamm, w d Pizolhüüte vom SAC stoot.

Literatur

• Manfred Hunziker: Ringelspitz/Arosa/Rätikon, Alpine Touren/Bündner Alpen, Verlag des SAC 2010, ISBN 978-3-85902-313-0

Weblink

 Commons: Pizol – Sammlig vo Multimediadateie

• e Website zum Pizol