S füsikalische Kabinett vo dr Uniwersidäät Baasel

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

47.5520148514657.5913408398628Koordinate 47° 33′ 7″ N, 7° 35′ 29″ O

S Huus zum Kirschgaarde, wo s Füsikalische Kabinett dehäi isch
Dialäkt: Baseldütsch

S Füsikalische Kabinett vo dr Uniwersidäät Baasel isch e Sammlig vo alte wüsseschaftlige Instrumänt. S Kabinett ghöört zum Historische Museum und befindet sich im Huus zum Kirschgaarde.

Gschicht[ändere | Quälltäxt bearbeite]

Dr Benedikt Stäächeli het as Brofässer für Füsik im Stachelschützehuus e Labor iigrichdet, und im ene Aabau die füsikalische Gräät und Instrumänt ufbewaart, won er für Versüech und Vorfüerigszwäck brucht het. Si Noochfolger dr Daniel Bernoulli het die Sammlig erwiteret und vo dene Apparäät si au hüte no e groosse Däil vorhande. Won er 1776 zruggdrätte isch, isch dr Underricht wie au s Kabinett mee und mee vernoochläässigt worde. Schliesslig het mä d Instrumänt us em Stachelschützehuus in s Undere Kollegium am Rhiisprung züüglet. Mit em Peter Meriaa, wo 1820 die meerjöörigi Wakanz gfüllt het, isch e Verbesserig im Underricht choo. 1821 het er zämme mit em Mathematiker Daniel Hueber und em Brofässer für Naturgschicht Christoph Bernoulli d Gründig vom Museum für Naturgschicht im Falkestäinerhoof aagstoosse. Au s füsikalische Kabinett und s chemische Labor si in Falkestäinerhoof verlegt worde. Dr Meriaa het die Füsikalisch Sammlig usbaut.[1]

Bi dr Baasler Kantonsdäilig isch au s Füsikalische Kabinett uf s Dabeet cho. Mä het d Instrumänt, wo dört ufbewaart worde si, nid as historischi Objekt aagluegt sondern as Instrumänt, wo no chönne brucht wärde oder as Grümpel.[2]

Under em Ordinarius fur Füsik und Chemii Christian Friedrich Schönbein, wo s Ozon entdeggt het, isch s Füsikalische Kabinett as Däil vom Naturwüsseschaftlige Museum 1849 in s nöije Museum an dr Augustinergass choo. [1]

1951 het mä s Huus zum Kirschgaarde afo as Woonmuseum iirichde und es het Blatz ghaa für anderi Sammlige wie e Borzellansammlig, en Uuresammlig und eben au s Füsikalische Kabinett. D Instrumänt us em 18. und früeje 19. Joorhundert si ins Kirschgaarte kho, s Departemänt für Füsik vo dr Uniwersidäät het si Sammlig vo nöijere Instrumänt bhaltet.

Fuessnoote[ändere | Quälltäxt bearbeite]

  1. 1,0 1,1 550 Jahre Universität Basel: Geschichte des Departements Physik der Universität Basel Archivlink (Memento vom 5. März 2016 im Internet Archive), Departement Physik Universität Basel www.physik.unibas.ch, 2009
  2. Johann Friedrich von Tscharner: Verhandlungen über die theilungsfrage in betreff der Universität Basel vor der eidgenössischen theilungskommission als bestelltem schiedsgerichte, Baumann, 1834, S. 118