Dr Kunstsammler Peter Vischer
Dr Peter Vischer (* 4. Mai 1751 z Baasel, † 20. Juli 1823 z Baasel) isch e Baasler Kaufmaa, Politiker und Kunstsammler gsi. Si Soon isch dr Peter Vischer-Passavant gsi.
Dr Vischer isch as Soon vom Kaufmaa Lienerd Vischer und dr Anna Catharina Birr 1751 z Baasel uf d Wält cho. Er stammt us em Daig. Si Ururgroossvadder isch dr Colmarer Gmischtwaarehändler Matthäus Vischer gsi, wo 1649 as religööse Flüchtling uf Baasel choo isch. 1777 het Peter Vischer d Dochder vom Siidebandfabrikant Lukas Saresi, d Anna Elisabeth ghürootet.
1778 isch dr Vischer Däilhaaber in dr Handelsgsellschaft Leonhard Vischer & Sohn worde. Vo 1777 isch er Groossroot worde und vo 1788 bis 1798 im Chläine Root vo dr Stadt Baasel gsässe. Si Schwooger Peter Ochs het en 1797 drzue drängt, im Groosse Root dr Aadrag z stelle, ass alli Bürger und Underdaane gliichgstellt wurde. Am 5. Januar 1798 isch d Baasler Revoluzioon mit dr Iifüerig von ere nöije Verfassig ume gsi. Wäared dr Helvetik isch dr Vischer vo 1798 bis 1803 Bresidänt vom Kantoonsgricht gsi. Wo dr Lukas Sarasi gstorbe isch, het er 1802 s Blaue Huus kauft und isch zum Siidenbandfabrikant worde und het sich us dr Politik zruggzooge.
Er het s Schloss Wildestäi z Buebedorf, won er 1792 vo siner Frau gerbt het, wider instand lo setze und d Woonzimme im romantische Stiil lo usmoole und usstatte. Dr Vische und vo 1823 si Soon Peter häi s Schloss zum Middelpunkt vo iire künstlerische Ambizioone gmacht und därt au e bedütendi Kunstsammlig aagläit.