D Baasler Familie Saresyy

Us der alemannische Wikipedia, der freie Dialäkt-Enzyklopedy
Dialäkt: Baseldütsch

S Saresyys si en altiigsässeni Baasler Familie.

D Saresyys si ursprünglig e Hugenottefamilie us Lothringe gsi und nit verwandt mit de Gämfer Saresyys.

Gschicht[ändere | Quälltäxt bearbeite]

Dr Duechhändler Regnault Sarasin (1533-75) isch uf Metz gflüchdet, vo dört isch si Soon Gédéon uf Baasel und het 1628 s Baasler Bürgerrächt üüberkhoo. D Saresyys si scho denn riichi Kauflütgsi, und si scho seer früe, sicher in de letschte Joorzäänt vom 17. Joorhundert, as Verleeger vo Siidebänder däätig gsi. Vermuetlig häi si au e Manufaktur in dr Stadt ghaa. Am Ändi vom 17. Joorhundert het s in dr Famiöie en Ufgoobedäilig gee. S Verlaagsgschäft isch vom Handel drennt worde und dr Hans Franz Saresyy (1649-1719) und sini Noochkomme, drunder sini Änggel Lukas (1730-1802) und Jakob (1742-1802), häi s witergfüert.

Wie alli Familie vom Baasler Daig häi au d Saresyys sich mit ere strikte Hürootspoltik mit andere Baasler Familie verschwöögeret. Scho im Gédéon si Soon Peter (1608-62) het e Buurged ghürootet und in de spöötere Generazione häi si sich under anderem mit de Hüüsler, Werthemann, Stehlin, Vischer, Christ oder Hoffmann verbunde. Im Gédéon si Änggel Peter (1640-1719) isch 1687 in dr Kläi Root gweelt worde, und mit iim si d Saresyys e Baasler Rootsgschlächt worde. Im Peter si Änggel Hans Bernhard (1731-1822) isch vo 1803 bis 12 dr erst Bürgermäister us dr Familie gsi. D Saresyys si au Gsandti zur Daagsatzig gsi.

Bsundrigs im 18. Joorhundert häi d Saresyys brächdigi Stadthüüser baut wie s Blaue Huus und s Wisse Huus und häi d Muusig, d Litratuur und d Kunst in dr Stadt gförderet. D Familie isch pietistisch gsi und het sich bis ins 20. Joorhundert für e Hufe regionali und internazionali religiöösi Instituzioone angaschiert.

D Bangg Sarasin, wo hüte no bestoot, goot uf d Gsellschaft Riggebach & Cie. zrugg, wo dr Alfred Saresyy 1893 übernoo het. Vo 1900 aa het s Undernääme A. Sarasin & Cie. ghäisse, vo 1987 aa Bank Sarasin & Cie. No am Aafang vom 21. Joorhundert si Verdräter vo dr Familie in dr Gschäftsläitig gsässe.

Bis in s 20. Joorhundert häi fast alli Saresyys z Baasel gläbt, denn häi si sich aber afo verströije.

Kwelle[ändere | Quälltäxt bearbeite]