Pandrosion

Us der alemannische Wikipedia, der freie Dialäkt-Enzyklopedy

D Pandrosion (altgriechisch: Πανδροσίων, au Pandrosion vo Alexandria) isch noch ere handschriftlige Überliiferig e griechischi Mathematikere in dr erste Helfti vom 4. Joorhundert z Alexandria gsi.

Kwelle[ändere | Quälltäxt bearbeite]

Si wird vom Pappos erwäänt und het zur gliiche Zit gläbt. Es isch mööglig, ass dr Pappos si as e Riwalin in dr mathematische Leer aagluegt und dorum aabegmacht het. Si Kritik im Dritte Buech vo sinere Sammlig isch abfellig und pedantisch und stoot in Zsämmehang mit ere nöije Methode, wo d Pandrosion vorgschlage het, zum Kubikwurzle z bestimme. En anders Brobleem, wo d Pandrosion noch em Pappos behandlet het, isch s arithmetische, geometrische und harmonische Middel vom ene Halbkräis gsi. Dr Hypatia-Biograaf Edward Jay Watts het dr Iidruck, ass dr Pappos, au wenn er sich lustig gmacht het über sä, in iir e Riwalin gsee het, wo mä sött ärnst nee.

S Gschlächt vo dr Pandrosion[ändere | Quälltäxt bearbeite]

Früener isch d Pandrosion in dr Liddratuur für e Maa ghalte worde, hützudaag dänggt mä aber, ass es sich woorschinlig um e Frau handlet. As Mathematikere isch si no vor dr Hypatia cho, wo in dr zwäite Helfti vom 4. Joorhundert bis öbbe 415 gläbt het. Es isch mööglig, ass d Pandrosion e Zitgnossin vom Vater vo dr Hypatia, em Theon vo Alexandria gsi isch und dr Watts dänggt, ass si d Hypatia sälber villicht no kennt het.[1]

S Kubikwurzlebrobleem[ändere | Quälltäxt bearbeite]

Iiri Löösig für d Kubikwurzle isch im Zsämmehang mit em klassische Broblem vo dr Verdobblig vom Würfel gstande, wo sich au dr Pappos drmit befasst het. Si het e rekursivi geometrischi Methode aagwändet, wo aber drei Dimensione brucht het, statt sich nume in dr Ebeni z beweege.[2] Noch em Knorr isch iiri Methode zum s geometrische Middel z konstruiere, exakt und äifacher gsi as die vom Pappos.

Iiri Wärk[ändere | Quälltäxt bearbeite]

Mä kennt käni Wärk von ere und in dr antike Liddratuur wird usser bim Pappos au uf käins vo iire Wärk Bezug gnoo. Es gseet us, ass si wie d Hypatia öffentlig Vorlääsige abghalte het, und wie bi dr Hypatia si iiri Studänte Manne gsi.

Dr Naame Pandrosion[ändere | Quälltäxt bearbeite]

Dr Name Pandrosion isch e Diminutiv vo Pandrosos. Bäidi Nääme si in dr Antike sälte. Es het z Athen e legendäri Heroine Pandrosos ge, wo d Dochter vom Kekrops I. gsi isch. Dr Tämpel Pandroseion uf dr Akropolis mit em häilige Olivebaum het vo dere si Naame überchoo. Dr Naame Pandroseios chunnt im ene antike afrikanischen Epigraaf in Teuchiris-Arsinoe vor.[3] Dr Federico Commandino het dr Naame Pandrosion in sinere latinische Pappos-Usgoob ganz usgloo.

Liddratuur[ändere | Quälltäxt bearbeite]

  • Edward Jay Watts: Hypatia. The Life and Legend of an Ancient Philosopher. Oxford University Press, Oxford 2017.
  • Gráinne McLaughlin: The Logistics of Gender from Classical Philosophy. In: Fiona McHardy, Eireann Marshall (Hrsg.): Women's Influence on Classical Civilization. Routledge, London / New York 2004, S. 7–25.

Weblingg[ändere | Quälltäxt bearbeite]

Fuessnoote[ändere | Quälltäxt bearbeite]

  1. Edward Jay Watts: Hypatia. The Life and Legend of an Ancient Philosopher. Oxford University Press, Oxford 2017, S. 94–97.
  2. Wilbur Richard Knorr: Pappus’ Texts on Cube Duplication. In: Wilbur Richard Knorr: Textual Studies in Ancient and Medieval Geometry. Birkhüüser, Boston 1989, S. 63–76.
  3. Alexander Jones (Hrsg.): Pappus of Alexandria. Book 7 of the Collection. Part 1: Introduction, Text, and Translation. Springer, New York 1986, S. 4.
Information icon.svg Dä Artikel basiert uff ere fräie Übersetzig vum Artikel „Pandrosion“ vu de dütsche Wikipedia. E Liste vu de Autore un Versione isch do z finde.