Jimmy Flitz

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Jimmy Flitz heisst die berüehmti Schwiizermuus us de Chinderbüecher und Hörspil vom Schwiizer Outor Roland Zoss. Si chunnt i zwone Hörspilreihe «Güschi» und «Jimmy Flitz - e Reis dür d Schwyz» vor. Und i der Schwiizer ChinderWiehnacht. Als Rocksong isch der Jimmy Flitz Chinderkonzärt 2004 landeswyt bekannt worde und uf der Wältmusik-CD 'Muku-Tiki-Mu'. Die rot-wyss gstreifleti Muus läbt uf em Berner Münster, em ne richtige Pilgerort für Jimmy Flitz-Fans. Syt 2014 gyts o ne App und der Jimmy-Flitzsong uf Änglisch, Spanisch und Französisch im ABC Dino Xenegugeli, em ne Tierlieder-ABC wo uf Bärndütsch gstartet isch.

I dere Hörspilreihe 1-6, wo vieli Schwiizer Mundarte und Schwäbisch vorchöme, spile grossi Mundartmeischter wie Marco Rima, Corin Curschellas, Pedro Lenz, Knackeboul, Christine Lauterburg, Hanery Amman, Eluveitie mit Anna Murphy, Büne Huber, Steff la Cheffe, Tinu Heiniger, Shem Thomas, Roland Zoss. Uf der Suechi nach alte Legände und magische Orte erfahre si ächti Fründschaft. Ds ufwändig gmache Hörspil bringt Chinder uf spylerischi Wys alti Kulture und Mundarte necher. Die erste 3 Teile hei zwo Guldigs Chrönli Priise übercho - öppis wie der Chinder-Oscar ir Schwiiz. U der Roland Zoss isch 2010 als eltischte dütschschwyzer Mundartliedermacher für Chinder vo der Post mit ere «Jimmy Flitz Briefmargge» geehrt worde.[1] Mit der Jimmy Flitz Chinder Wiehnacht, em 4. Teil vor sächsteilige Reihe, reiset d Muus i re grosse Adväntsmusig mit Jodel, Räp und Rock-Grössine mit tierische Fründe zum Christchind nach Bethlehem. Und derfür überchunnt der Outor die grösschti Schwiizer Uszeichnig "Beschts Chinderliedalbum - Guldigs Chrönli 2015.[2]

Die chlyni Muus isch druff und dranne sech als Identifikationsfigur für ne moderni Schwiiz mit vilne Mundarte und Sprache z etabliere. Si singt nämlech rockig oder volkstümlich und schafft o der Spagat zwüsche Gross und Chly, Musig und Literatur. Ds Buech Jimmy Flitz die Schweizermaus isch o uf Dütsch erschine im rikiverlag. Und de Roland Zoss, «der Maa mit der Muus» singt und tanzt a vilne Chinderaläss und Schuele dür d Schwiiz. Und ds Wiehnachtsmusical wird traditionell all Jahr ufgfüehrt i verschidene Chilchene.

Weblink[ändere | Quälltäxt bearbeite]

Fuessnoote[ändere | Quälltäxt bearbeite]

  1. Sondermarken Die Schweizermaus «Jimmy Flitz» (Memento vom 23. Oktober 2014 im Internet Archive) PDF-Datei vom ene Prospäkt öber d 85-Rappe-Sondermarke
  2. S Goldige Chrönli 2015 Mittailig uf de Website vo de Verainigung zur Förderig Schwizer Jugendkultur