S Kunstmuseum Basel ǀ Geegewart
| Dialäkt: Baseldütsch |
S Kunstmuseum Basel | Geegewart, früener Museum für Geegewartskunst, am Dalbe-Rhiiwääg 60 z Basel isch 1980 as erste öffentlige Usstelligsbau in Europa eröffnet worde, wo usschliesslig dr zitgenössische Kunstbrodukzioon und -braxis gwidmet isch. S Museum isch käi sälbständigi Instituzioon, sondern ghöört administrativ zum Kunstmuseum Basel, wo under em rächtlige Oberbegriff Öffentligi Kunstsammlig Basel lauft. Es zäigt Wärk us em Kunstmuseum und us dr Emanuel Hoffmann-Stifdig. S Geböid isch e Baasler Kulturguet mit regionaler Bedütig und d Sammlig stoot uf dr Liste vo de Kulturgüeter, wo nazionali Bedütig häi.
S Museum goot ursprünglig uf e Leihgoob vom italiänische Kunstsammler Giuseppe Panza di Biumo zrugg, Wo Basel in dr Middi vo de 1970er Joor aabote het, e Hufe vo sine zitgenössische Wärk uszleene, wenn mä geigneti Rüümlikäite für sä wurd finde. Druf isch im Basler Dalbedaal s Museum für Geegewartskunst entstande. D Christoph Merian Stifdig het paralleel zur umfassende Sanierig vo däm Kwardier 1978–1979 en ehemooligi Babbiirfabrik mit eme Nöibau noch Blään vom Basler Archidekturbüro Steib+Steib zum zwäidäilige Museum umbaut. S Brojekt isch zu wääsentlige Däil vo dr Mäzenin Maja Sacher-Stehlin finanziert worde mit dr Bedingig, ass die Öffentligi Kunstsammlig dört Kunstobjekt vo dr Emanuel Hoffmann Stifdig wurd usstelle. Dr Kanton Basel-Stadt het s Grundstück und s Baurächt gstifdet und zaalt sit 1991 die ganze Bedriibschoste. 2005 isch dr Bau umfassend renoviert worde.
D Sammlig
[ändere | Quälltäxt bearbeite]
S Museum bresentiert Kunst, wo vo de 1960er Joor bis in d Geegewart entstande isch. Es sammlet scho sit 1971 näbe de klassische Medie wie Moolerei oder Plastik au Videokunst. D Schwerpünkt vo dr Sammlig si d Wärk vom Joseph Beuys, Bruce Nauman, Rosemarie Trockel, Jeff Wall und die aktuelli amerikanischi Kunst (Robert Gober, Elizabeth Peyton, Matthew Barney). Wärk vo dr Emanuel Hoffmann-Stifdig, wo nid usgstellt wärde, wärde sit 2003 im Schaulager z Münchestäi ufbewaart.
Weblingg
[ändere | Quälltäxt bearbeite]
|
Dä Artikel basiert uff ere fräie Übersetzig vum Artikel „Museum_für_Gegenwartskunst_(Basel)“ vu de dütsche Wikipedia. E Liste vu de Autore un Versione isch do z finde. |
Koordinate: 47° 33′ 16,5″ N, 7° 36′ 5″ O; CH1903: 612251 / 267108