Morgestern

de Morgestern mit de Moosichle

De Morgestern isch d Bizaichnig för der Planet Venus, wener im Morge in Himmel stoot. Er isch denn de hellst Stern.

Well d Venus en innere Planeet isch, cha si nie i de Opposition vo de Sune stoo und dromm au nie um d Miternacht gsie were. Si cha sich vo de Erde uus gsie nie mee as 48° de Sune entferne.

I de Mythologie vo de alte Völcher isch de Morgestern recht hüüffig vereert wore, im Gegesatz zo Oobestern. Bi de antike Grieche hett er Eosphoros oder Phosphoros ghaiise und bi de Röömer Lucifer. Bi de früene Christe isch de Lucifer no as Symbol för de Jesus Christus gstande, spööter isch aber Luzifer zom Name vom Tüüfel wore.

Bi de Inder isch de Morgestern mitem Waise Usana gliichgsetzt wore, bi de Balte mitem Auseklis. Im Alte Orient sind de Morge- und de Oobestern as e Brüederpaar vereert wore, so bi de Araber i de Röömerzitt as Monimos und Azizos und z Ugarit as Šaḥr und Šalim. Z Mesopotamie isch aber de Planet Venus mit de Göttin Ištar gliichgsetzt wore und isch denn öber d Astrologii vo de Grieche mit de Aphrodite und vo de Röömer mit de Venus gliichgsetzt wore.