Michael Gaedt

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Mit "Die kleine Tierschau" uff-em Zelt-Musik-Festival 2015 z Freiburg
Dialäkt: Schwäbisch

Dr Michael Gaedt (* 31. Juli 1957 z Schwäbisch Gmend) ischt a deitscher (schwäbischer) Kabareddischt, Musiker ond Schauschbiilr.

Aus seim Leaba[ändere | Quälltäxt bearbeite]

Dr Michael Gaedt ischt em Jôhr 1957 z Schwäbisch Gmend uf d Welt komma. Ufgwagsa ischt’r ganz en dr Nähe vo seira Geburtsstadt, nemlich z Heibach em heidiga Oschtalbkreis am Fuaß vo dr Schwäbischa Alb. Nôch seira Schualausbildong hôt’s da Gaedt zerscht amôl fir a lengra Zeit ens Ausland vrschlaga. Om sein Lebensondrhalt bestreida zo kenna, hôt’r en Kanada bei dr Fischinduschtrii gschafft. Wia-nr wiidr em Schwôbalendle zruck gwäa ischt, hôt’r zonägscht a Lehr zom Stoimetz ond hendrher noh a Ausbildong zom Denzr gmacht, zerscht z Stuegert ond nô noh en New York.

Em Jôhr 1981 hôt dr Gaedt – zamma mit seine Schuelkamrada Ernst Mantel ond Michael Schulig – a Kómedigrubbe grendet. Dera hend dia drei da Nama Die kleine Tierschau gäa. Fir an Außastehenda isch dui Bezeichnong a bissle irrefihrend, denn mit Viicher hôt-se nix em Senn. Au wenn s Programm ganz ibrwiigend uf broid Schwäbisch drherkommt, tourt dui Grubbe fascht em ganza deitschschbrôchiga Room omanandr. Oine vo ihre Hauptschbiilstedda isch s Theaterhaus z Stuegert. Se send abr ondr andrem au scho em Tempodrom z Berlin ond em Schmidts Tivoli en Hamburg ufdredda.

Als Filmschauschbiler hôt-ma da Gaedt s erschde Môl 1998 en-ra kloina Roll em Stuegerter Tatort-Krimi „Bienzle und der Champion“ seha kenna. En sellra vom ZDF seit 2009 drehda Krimiserie „SOKO Stuttgart“, wo emmr am Donnschdich em Vorôbedprogramm ausgschdrahlt wuud, schbiilt’r da Gaschtwirt Schrotti ond vrleiht so dera Serie a bissle a schwäbischs Lokalkolorit. Au en dr Familiaserie „Die Fallers“ vom Sidweschtrondfonk hôt’r a kloina Neabaroll als Rockmusiker kriagt, wo hin- ond wiidr em Landgaschthof zom „Leewa“ eikehrt.[1]

Sei Theaterdebii als Schauschbiiler hôt dr Gaedt am 13. Januar 2006 en dr Komödie im Marquardt z Stuegert gäa, wo-nr d Roll vom Harold Gorringe em Luschtschbiil „Komödie im Dunkeln“ vom Peter Shaffer ibrnomma hôt.

A Auswahl vo de Film, wo-nr dren mitgspilt hot[ändere | Quälltäxt bearbeite]

  • 1998: Tatort: Bienzle und der Champion
  • 2006: Im Netz
  • 2010–2012: Die Fallers – Eine Schwarzwaldfamilie
  • 2013–2017: SOKO Stuttgart
  • 2014: Ohne Dich
  • 2016: Metalophobia
  • 2016: White Pillow
  • 2017: Leichtmatrosen – Drei Mann in einem Boot

Quella[ändere | Quälltäxt bearbeite]

  • S Programmheftle vom Theatr Komödie im Marquardt en Stuegert zom Luschtschbiil „Komödie im Dunkeln“ aus dr Schbiilzeit 2005/2006 (Uf de Seida 22 bis 23 standet Biografia vo de Leit, wo an dr Uffihrong beteiligt send.)
  • Lueg d Weblink

Weblink[ändere | Quälltäxt bearbeite]

Oinzlne Nôchweis[ändere | Quälltäxt bearbeite]

  1. Bericht ibr de akduelle Dreharbeida en dr Stuegerder Zeidong (Ausgab fir da Kreis Beeblenga) vom 30. Sebtembr 2011, S. 30