Messias (Klopstock)
Der Messias isch en Epos in 20 Gsäng vom Friedrich Gottlieb Klopstock.
Dr Klopstock het die erste drei Gsäng vom Messias 1748 mit em Underditel "Ein Heldengedicht" uusegee. Nodinoo het er die andere Gsäng veröffentligt, zämme mit revidierte Fassige vo de Däil, wo scho publiziert gsi si. Die ersti vollständigi Usgoob isch 1772 erschiine, überarbäiteti Fassige si 1781 und 1798 uusechoo. Dr Klopstock het as erste in dr dütsche Litratuurgschicht im ganze Epos Hexameter brucht und het sich eso an d Epe vom Homer (Ilias und Odyssee) aagläänt. Mit sim Inhalt het dr Messias z Dütschland d Epoche vo dr Empfindsamkäit iigläitet.
S Wärk isch e Vorbild für d Messiade gsi, wo vom 18. Joorhundert aa entstande si.