Martin Winterhalter

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Dr Martin Winterhalter (* 13. Novämber 1940 z Ättene) isch e dytsche Lehrer un Dialäktdichter.

Lääbe[ändere | Quälltäxt bearbeite]

Dr Winterhalter isch as erschts vu drei Chinder uf d Wält chuu. Ufgwachse isch er z Ättenewyler. Noch em Abitur am Gimnasium z Ättene het er an dr Pedagogische Hochschuel z Fryburg uf Lehramt studiert. Är het zerscht an ere Realschuel z Wolfe unterrichtet, derno z Kähl un speter an dr Hilfsschuel z Offeburg. Schließli het er z Stuegert no Hilfsschuel- un Sprochhailpedagogik studiert. Bis 1968 het er z Lohr gschafft, derno het er dr Ufdrag iberchuu, fir dr Sidbezirk e aigeni Hilfsschuel ufzböue. Wel s z Ättene kai Ryym gee het, isch die Hilfsschuel schließli z Orschwier ufgmacht wore. Är isch 32 Johr lang bis zue syre Pensionierig anne 2000 Räkter vu dr Hilfsschuel Orschwier gsii, hit haißt si Ferderschuel Orschwier. Dr Winterhalter isch au 30 Johr lang im Vorstand vu dr chilchlige Sozialstation gsii.

Anne 1964 het er d Ortrud Strickfaden ghyrote. Si hän zäme vier Sihn iberchuu.

Dr Martin Winterhalter schrybt syt langem Gedicht un Gschichtli uf Alemannisch, mänkmol au uf Hochdytsch. Syne Rede, wun er ghalte het, wänn d Schueler us dr Schuel entloo wore sin, sin vylmol in Gedichtform uf Alemannisch gsii. Är isch Mitglid vu dr Muettersproch-Gsellschaft un het dert d Regionalgruppe „Rund um dr Kahlreberg“ mitgrindet. Anne 2009 het er unter em Titel „So isches halt – s’ Läwe“ e Biechli mit Gedicht un Gschichte uf Alemannisch un Hochdytsch uusegee.

Syt Ändi 1960er Johr isch dr Martin Winterhalter Mitglid im Schwarzwaldverain.

Wärch[ändere | Quälltäxt bearbeite]

  • So isches halt – s’Läwe, Gedichte, Geschichten, Erinnerungen in Wiilemer Mundart und in hochdeutsch. Druck und Verlag Stückle, Ettenheim 2009. 112 S.

Weblink[ändere | Quälltäxt bearbeite]