Martha Lüthy-Zobrist

Us der alemannische Wikipedia, der freie Dialäkt-Enzyklopedy

D Martha Lüthy-Zobrist (* 16. Augschte 1876 z Winterthur; † 14. April 1943 z Bärn) isch e Schwyzer Frauerächtleri un d Zäntralbresidänti vum Schwyzerische Frauegwärbverband gsii.

Lääbe[ändere | Quälltäxt bearbeite]

D Martha Lüthy-Zobrist isch as Dochter vum Schuemacher Heinrich Zobrist un syre Frau Elisabeth Widmer uf d Wält chuu. Si isch bi stränge Bfläägeltere ufgwachse un het Dameschnyderi glehrt. Anne 1899 het si mit 23 Johr dr Briefdreeger Jakob Lüthy ghyrote. Noch em frieje Dood vum Mann het si ihre aige Dameschnyderatelier gfiert. Anne 1918 het si dr Damenschnyderneverband Winterthur grindet.

D Martha Lüthy-Zobrist isch 1920 Mitgrinderi vum Schwyzerische Frauegwärbverband gsii un vu 1923 bis 1943 au Zäntralbresidänti vun em. As erschti Frau isch si 1924 in Vorstand vum Schwyzerische Gwärbverband gwehlt wore. Anne 1928 het si im Ufdrag vum Patronatskomitee unter em Vorsitz vu dr Bundesreet Giuseppe Motta un Edmund Schulthess di Schwyzerisch Uusstellig fir Frauenarbet z Bärn organisiert.[1] Zuesetzli het si 1929 di vollamtli Laitig vu dr Gschäftsstell vum Frauegwärbverband ibernuu. In ihre Funktion het si si derfir yygsetzt, ass e Maischternebriefig gschaffe wird, fir di beruefli Wyterbildig un fir e Reglementierig vu dr Beruefslehre im Frauegwärb. Unter anderem het si 1930 in dr usserbarlemäntarische Studiekummission fir s Bundesgsetz iber di beruefli Uusbildig mitgwirkt.[2]

Dr Schwyzerisch Gwärbverband het si anne 1938 zum Ehremitglid ernännt.

Weblink[ändere | Quälltäxt bearbeite]

Fueßnote[ändere | Quälltäxt bearbeite]

  1. S.F.: Autour de la "SAFFA": (exposition suisse du travail féminin). In: Le mouvement féministe: organe officiel des publications de l'Alliance nationale des sociétés féminines suisses. 1926, abgruefen am 23. Februar 2019.
  2. S.F.: Natürlich wieder die Lehrerinnen! In: Schweizerische Lehrerinnenzeitung. 1943, abgruefen am 23. Februar 2019.
Information icon.svg Dä Artikel basiert uff ere fräie Übersetzig vu dere Version vum Artikel „Martha_Lüthy-Zobrist“ vu de dütsche Wikipedia. E Liste vu de Autore un Versione isch do z finde.