Marie von und zu Liechtenstein

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
d Fiirschti Marie
d Fiirschti Marie (2011)

D Fiirschti Marie Aglaë Bonaventura Theresia vu un zue Liachtaschtaa, Herzoogi vu Troppau un Jägerndorf, Greefi zue Rietberg, gebooreni Greefi Kinsky vu Wchinitz un Tettau (* 14. April 1940 z Prag; † 21. August 2021 z Grabs, Schwyz[1]) isch syt em 30. Juli 1967 d Frau vum Fiirscht Hans-Adam II. vu un zue Liachtaschtaa gsii, em Staatsooberhaupt vum Fiirschteduum Liachtaschtaa.

Lääbe[ändere | Quälltäxt bearbeite]

Uf d Wält chuu isch si z Prag as Doochter vum Groof Ferdinand Carl Kinsky vu Wchinitz un Tettau (1907–1969), wu bis anne 1946 uf Schloss Horaschdowitz aasässig gsii isch, un dr Greefi Henriette, geboorei Greefi vu Ledebur-Wicheln. Si isch s viert vu siibe Chinder gsii, ire eltscht Brueder isch dr Bolitikwisseschaftler Ferdinand Groof Kinsky (1934–2020) gsii.

Si isch uf s Internaat un Realgimnaasium in dr Haimschuel Chlooschter Wald vu dr Benediktiinerne z Baade-Wiirtebäärg gange, het derno an dr Akademy fir Gebruuchsgrafik studiert un het ire Diploom abglait. Zwee Sproochufenthalt z Ängland un z Frankryych hän derzue dient, iri Sproochechäntnis z verbessere. Derno het si bis zu eire Verloobig anne 1965 as Gebruuchsgraafikeri in ere Druckerei z Dachau gschafft.

Si isch Eerebresidänti vum Liachtaschtaanische Roote Chryz un Bresidänti vum Verain for Hailpedagoogischi Hilf gsii.

Am 30. Juli 1967 het si dr doomoolig Eerbbrinz Hans-Adam in dr kadooolische Stadtpfaarchilche St. Florin z Vaduz ghyroote. S Fiirschtebaar het vier Chinder:

  • Dr Eerbbrinz Alois (* 11. Juni 1968) isch syt em 3. Juli 1993 ghyroote mit dr Sophie Brinzässi z Bayern (* 28. Oktober 1967), ere Nichte vum derzytige wittelsbachische Familienooberhaupt Franz vu Bayern. Si hän vier Chinder: Brinz Joseph Wenzel (* 24. Mai 1995), Brinzässi Marie-Caroline (* 17. Oktober 1996), Prinz Georg (* 20. April 1999) un Brinz Nikolaus (* 6. Dezämber 2000)
  • Dr Brinz Maximilian (* 16. Mai 1969) isch syt em 29. Jänner 2000 ghyroote mit dr Angela Brown (* 3. Februar 1958). Si hän e Suhn, Alfons Constantin Maria (* 18. Mai 2001).
  • Brinz Constantin (* 15. März 1972) isch syt em 5. Juni 1999 ghyroote mit Gräfin Marie Kálnoky von Kőröspatak (* 16. Juli 1975). Si hän zwee Sihn, Moritz Emanuel Maria (* 27. Mai 2003) un Ferdinand Hubertus Maria (* 18. Mai 2008), un e Doochter, Georgina Maximiliana Tatiana Maria (* 23. Juli 2005).
  • Brinzässi Tatjana (* 10. April 1973) isch syt em 5. Juni 1999 ghyroote mit em Philipp vu Lattorff (* 25. März 1968). Si hän siibe Chinder: Lukas Maria (* 13. Mai 2000), Elisabeth Marie Angela (* 25. Januar 2002), Marie Teresa (* 18. Januar 2004), Camilla Maria Katharina (* 14. November 2005), Anna Pia Theresia Maria (* 3. August 2007), Sophie Katharina Maria (* 30. Oktober 2009) un Maximilian-Maria (* 17. Dezember 2011)

Am 18. Augschte 2021 isch d Fiirschti Marie no me Schlaag ins Spitaal vu Grabs yygliiferet woore, wu si am 21. Augschte gstoorben isch.[2]

Weblink[ändere | Quälltäxt bearbeite]

 Commons: Marie Fiirschti vu Liachtaschtaa – Sammlig vo Multimediadateie

Fueßnote[ändere | Quälltäxt bearbeite]

  1. Medienmitteilung des Fürstenhauses
  2. „Fürstin Marie von und zu Liechtenstein gestorben“ in orf.at voum 21. Augschte 2021