Marie-Theres von Gunten-Walthert

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

D Marie-Theres vo Gunte-Walthert (* 8. Nofämber 1951 z Baldegg) isch e Schwiizer Komponischtin und Chordirigäntin. Sid 1991 läbt si z Beatebärg.

D Marie-Theres vo Gunte isch ane 1951 als Dochter vo Puurelüüt uf d Wält cho und z Baldegg, eme Ortsdeil vo Hooftere im luzärnische Deil vom Seetaal, ufgwachse. Si het im Jodlerklub vo Hoftere gleert singe und jodle und bim Jodlerklub Echo vom Santebärg z Wauwu mitgmacht. Wo si dr Dirigäntekurs gmacht het, isch si d Leiterin vom Jodlerklub vo Göiesee worde. Sid ane 2006 dirigiert si au s Wäber-Chörli vo Bärn. 2011 het si derzue d Leitig vom Oberländerchörli Interlake übernoo. Au z Roggu im Oberaargau und z Äflige het si Jodlerchöör gleitet.

Ane 1981 het d Marie-Theres vo Gunte agfange z komponiere. Es sind vil Lieder für Jodlerchöör entstande, zerscht vor alem uf Tegscht vom Soledurner Mundartdichter Beat Jäggi, denn au es baar mit sälber tichtete Värs, und spöter het si meischtens Wort vo irem Brueder Jules Walthert verdoont.

Fürs Schwiizer Chilemusigfescht cantars het si ane 2011 d Jodlermäss mit em Titel «Bhüet euch!» gschribe, wo si mit grossem Erfolg vo de Jodlergruppe vo Göiesee und Bärn het lo uuffüere, under anderem au i dr Auguschtynerchile z Züri.

2006 het d Marie-Theres als Uuszeichnig für ires Gsamtwärch dr Guldig Violynschlüssel überchoo.[1]

Weblink[ändere | Quälltäxt bearbeite]

Fuessnoote[ändere | Quälltäxt bearbeite]

  1. Goldener Violinschlüssel 2006 an Marie-Theres von Gunten uf dr Website vom Verein Guldige Violynschlüssel