Margarete Steiff (Film)

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Filmdate
Orginaltitel: Margarete Steiff
Produktionsland: Deutschland
Längi (PAL-DVD): 95 Minute
Orginalsprooch: Deitsch
Altersfreigaab: FSK Ohne irgend a Aldersbeschrenkong
Stab
Regie: Xaver Schwarzenberger
Dräibuech: Susanne Beck
Thomas Eifler
Produktion: Arno Ortmair
Dieter Pochlatko
Musig: Hans Jürgen Buchner
Haindling
Kamera: Xaver Schwarzenberger
Schnitt: Helga Borsche
Bsetzig
  • D Heike Makatsch als Margarete Steiff
  • D Annika Luksch als Margarete em Alder vo zäah Jôhr
  • Dr Herbert Knaup als dr Margarete ihr Vadder
  • D Suzanne von Borsody als dr Margarete ihr Muader
  • Dr Felix Eitner als Fritz Steiff, a Bruader vo dr Margret
  • Dr Niklas Ehrensberger als Fritz em Alder vo siiba Jôhr
  • D Bernadette Heerwagen als Charlotte
  • D Michelle Ilibasic als Charlotte em Alder vo 10 Jôhr
  • Dr Hary Prinz als Julius
  • Dr Donald Arthur als Hollow
  • D Corinna Beilharz als Nähere Siglinde
  • D Sigrid Burkholder als Anna
  • Dr Gerhard Ernst als Großhändler Messe
  • Dr Hubertus Gertzen als Bankdirektr
  • Dr Ferdinand Grözinger als Liferant
  • D Elke Hagen als moderna Daam
  • Dr Jan Jericho als Hans
  • Dr Frieder Klein als Hans em Alder vo elf Jôhr
  • Dr Karl Knaup als Doktr
  • Dr Christian Koerner als Pfarrer
  • Dr Harald Krassnitzer als Dr. Werner
  • Dr Max Lau als Richard em Alder vo nai Jôhr
  • D Lilia Lehner als Marie
  • D Eva Löbau als Pauline
  • D Patrizia Moresco als Frau vom Bankdirektr
  • D Katrin Reisinger als Frau Werner
  • Dr Stephan Richter als Assessor
  • Dr Heinrich Schmieder als Lehrer
  • D Kathrin Schwinghammer als Pauline em Alder vo zwelf Jôhr
  • Dr Ronald Sebold als Eikaifer bei dr Messe
  • D Katharina Seeberger als Marie em Alder vo elf Jôhr
  • Dr Matthias Franz Stein als Dolmetscher
  • D Gisela Strehle als Nähere Adelheid
  • Dr Bernd Tauber als Sauter
  • ond sonscht noh an Haufa Stadischda als Fraua ond Manna
Dialäkt: Schwäbisch

Margarete Steiff ischt a deitsch-eschtreichisch-italienischer Fernseh-Schbiilfilm us-em Jôhr 2005 vom Regisseur Xaver Schwarzenberger, wo d Lebensgschicht vo dr schwäbischa Undrnehmere Margarete Steiff vo dr Oschtalb zom Inhalt hôt. S Drehbuach stammt vo dr Susanne Beck ond em Thomas Eifler. Z Deitschland isch der Film zom erschda Môl am 23. Dezember 2005 uff ARTE ausgschdrahlt wôrra. Federfihrend fir d Produkzioo isch dr Sidweschtrundfunk (SWR) gwäa.

Handlong[ändere | Quälltäxt bearbeite]

Scho en jonge Jôhr erkrankt d Margret Steiff, s Dechterle vo-ma arma Ehepaar z Giinga an dr Brenz, an Kenderlehmong. Des Leida brengt-se abr et drvoo ab, en d Schual zo ganga ond fleißich zo lerna. Ihre Lehrer send beeidruckt vo deam graußa Selbschtbewusstsei, wo des Kend an da Dag legt.

Als jonga Frau hôt d Margret Steiff da graußa Wonsch, sich z Wien vom Dr. Werner behandla zo lau, weil se gheert hôt, dass dr sell en Fäll wia bei ehra scho a baar Môl hôt helfa kenna. Ihre Eltra send abr et en dr Lag, d Koschda fir dui Reis en de eschtreichisch Hauptstadt ond dui Operazioo durch dean berihmda Arzt uffzobrenga. Zom Glick fir d Margret ibrnemmt ihr Hoimetgmoind an graußa Doil vo de Koschda. Wia abr dui Behandlong et zom gwenschda Erfolg fihrt, send ihre Geldgeaber entdeischt. D Margret selber glaubt abr fescht drôô, dass-se trotz älle Widrichkeida a halbweags normals Leaba fihra kôô, weil-se – abgseha vo dr Kendrlehmong – anschonschda vollkomma gsond ischt.

Bei ihrer Hoimfahrt lernt des Mädle em Zug da Nähmaschena-Vrtreter Julius kenna. Bald druff vrkauft dr sell dr Familie Steiff oina vo seine Maschena. D Margret môôg dean Kerle emmer meh, ond s dauret et lang, bis dr Julius en Giinga sesshaft wuud. So nôch ond nôch schafft’s d Margret, trotz ihrer Behenderong Konfekzionswara herzostella, wo sich seha lassa kennet. Wia-se nô uff-em Weihnachtsmarkt Schbiilzeigelefanda aus Stoff vrkauft, fellt em Ort ihr grauß Nähtalent auf. Zo ihrem Loid wendet sich bald dr Julius vo-ra ab, om ihr beschda Freindin Charlotte zo heirada. Der Omstand leest bei dr Margret abr bloß dui Folge aus, dass-se sich jetzt noh viil intensiver en d Arbet stirzt.

Wia d Firmabesitzere Margarete Steiff mit dr Rickzahlong vo ihre Schulda a halbs Jôhr aussetza muaß, weil’s Gschäft mit de Schbiilzeigelefanda grad et bsonders lauft, droht-ra d Bank mit dr Ibrnahme vo ihrer Firma. Dô kommt dui Undernehmere uff da Gedanka, als Schbiilzeig jetzt Stoffbära mit bewegliche Ärm herzogstella. Wia nô noh a Amerikaner vo soddiche Exemplar vo Teddybära a bsondrs graußa Liiferong en Ufftrag geit, gôht’s mit dr Margret ihrer Firma schnell wiidr bergauf.

Film ond Wirklichkeit[ändere | Quälltäxt bearbeite]

Dui Figur vom Wiiner Schirurga Werner ischt an da schwäbischa Arzt Dr. August Hermann Werner (1808 bis 1882) ôôglehnt, wo datsächlich d Margarete Steiff behandlet hôt, abr et z Wiin, sondern en Wildbad em Schwarzwald. – Als Erfender vom Teddybära gilt heitzodag dr Richard Steiff, a Neffe vo dr Margarete. Dr sell ischt em Jôhr 1897 en da Betriib vo seira Dande eigschdiiga ond hôt 1902 da Prodotyp „Bär 55 PB“ entwicklet. Uff dean Môô gôht au dui Planong ond dr Bau vo dera Fabrikhall us Bedoo ond Stahl zruck, wo mr em Film seha kôô.

Zor Herstellong vo deam Film[ändere | Quälltäxt bearbeite]

Dr Bôhhof vo Maslhõẽm, wo em Film als Kulisse vom Bôhhof Giinga an dr Brenz dihnt hôt.

D Außa-Uffnahma send vo Midde Mai bis Midde Juni 2005 en Bad Wimpfa entstanda.[1] Dr hischdorische Bôhhof vo Maslhõẽm em Landkreis Biberach hôt em Film am 21. ond am 22. Juni 2005 als Drehort fir da Bôhhof vo Giinga herhalda miaßa. [2] Weil dia Dreharbeida em Sommer staddgfonda hend, d Szena abr em Wendr schbiilet, send kinschtliche Schneeflocka eigsetzt wôrra. An graußer Doil vo de Enna-Uffnahma send em Hohaloher Freilandmuseom Wackershofa dreht wôrra.

Auszoichnonga[ändere | Quälltäxt bearbeite]

Bei dr Bambi-Vrleihong 2006 en Stuegert hôt der Film da Publikomspreis ond d Hauptdarstellere Heike Makatsch da Preis en dr Kategorii Beschda Schauschbiilere nazional kriagt. Noh em gleicha Jôhr hôt d Makatsch fir ihr Roll als Margarete Steiff da Boirischa Fernsehpreis kriagt ond ischt en de USA mit-em Emmi Award auszoichnet wôrra.

Kridik[ändere | Quälltäxt bearbeite]

  • S Lexikon des internationalen Films moint, es dät sich bei deam Stroifa om a bewegenda Gschicht ibr a emanzipiirda Frau handla, wo sich trotz an Haufa Rickschläg ond kerperliche Nôchdoil et ondrkriaga lau will ond mit-ra Zuavrsicht ihr Leaba moischtret. Der Film wär sensibl inszeniirt ond en dr Titl-Roll vorziglich gschbiilt. A Film mit grauße Gfiahl, des abr em beschda Senn.

Oinzlne Nôchweis[ändere | Quälltäxt bearbeite]

  1. D Pressemitdoilong vo dr Stadtvrwaldong Bad Wimpfen auf badwimpfen.de
  2. Fodogalerii zo de Dreharbeida en Maselheim auf maselheim.de

Weblink[ändere | Quälltäxt bearbeite]

Information icon.svg Dä Artikel basiert uff ere fräie Übersetzig vu dere Version vum Artikel „Margarete_Steiff_(Film)“ vu de dütsche Wikipedia.

E Liste vu de Autore un Versione isch do z finde.