Louis Ruffieux

Dr Louis Ruffieux (* 6. Jänner 1848 z Saussivue im Kanton Fryburg; † 9. Juni 1909 z Fryburg) isch e Schwiizer Naturforscher und Archivaar gsi.

Er het z Greyerz un z Bulle d Schuele bsuecht und isch dänn ufs Kolleegi Saint-Michel z Fryburg ggange. Sit synere Jugend het er sech staarch für d Natur inträssiert und chönnen Artikel für regionaali Zytschrifte schrybe; er het bi dr Bestandsuufnaam vo dr Pflanzewält im Fryburgerland mitghulfe und au sälber es Herbaar agläit. Sys grosse Gebiet sind d Schwümm gsi, syni Fünd het er mäischterhaft i schööne Zeichnige feschtghalte. I synere Schrift Catalogue des champignons observés dans le canton de Fribourg het er meh weder anderthalbtuusig Aarte vo Schwümm dokumäntiert.

Mit 46i isch er usem Oberland uf Fryburg abe ggange, won er ane 1894 Regischtraar bim Staatsarchyv vo Fryburg woorden isch. Als Fryburger Uskumftspersoon für dr yhäimisch Dialäkt, dr Fryburger Patois, het ne dr Nöieburger Romanischt Louis Gauchat für sys Wälschschwiizer Wörterbuechprojäkt Glossaire des patois de la Suisse romande gschetzt.

Am 9. Juni 1909 isch dr Ruffieux im Bürgerspital Fryburg gstoorbe.

Literatur

• Vincent Riuz-Badanelli: Louis François Siméon Ruffieux. Naturaliste et mycologue fribourgeois méconnu (1848–1909). In: Bulletin de la Société Fribourgeoise des Sciences Naturelles, 102, 2013, S. 123–128.
• M. Kraft: Louis Ruffieux, mycologue fribourgeois (1848–1909). In: Bulletin Suisse de Mycologie, 1953, S. 129–135.
• Eric Flückiger: Les patoisants et le GPSR. In: L’ami du patois. Trimestriel romand, 33, 2006, S. 51–55.