Kyokushin Kaikan

Us der alemannische Wikipedia, der freie Dialäkt-Enzyklopedy

Kyokushin Kaikan (jap. 極真会館) isch en Karate-Organisation, wo vom Ōyama Masutatsu gründed worde isch. Es isch de Oberbegriff vo allne Betriiber vom Karate-styl Kyokushin, was übersetzt "die letsti, absoluti Wahrheit" bedütet. Was die Stilrichtig vo anderne abhebt isch, dass me mit Vollkontakt kämpft. Us em Kyokushin-Karate sind villi wiiteri Stilrichtige entstande, was s Kyokushin zunere gschichtlich bedütende Kampfsportart macht.

s Kyokushin-Zeiche

Gschicht[ändere | Quälltäxt bearbeite]

In China isch es vo der Regierig um 1400 und 1600 verbote gsi Waffe z verwände. Zum Schutz vor Kriminelle und zum Teil au vor Behörde isch in sträng gheime Tämple der Kampf ohni Waffe trainiert worde.

Um 1901 sind die Kampftechniken unter anderem au nach Okinawa (Japan) bracht worde. De Meister Gichin Funakoshi hed denn do druss s moderne Karate entwicklet. Er isch 1916 nach Tokio zoge, wo er 1922 erstmals Karate a de Öffendlichkeit vorgstellt hed. Us sim Karate sind insgesammt über 70 Stilrichte entstande.

En Schüler vom Meister Gichin Funakoshi isch de Oyama Matsutatsu gsi. Er isch us Korea gsi. Scho in junge Jahre isch er begeisteret gsi vo Kampfkünst. Mit nüün Jahr hed er chinesisches Kempo studiert. I sinere Jugend isch er nach Japan um Kampfpilot z wärde. Doch wil er Korreaner gsi isch und somit zunere diskriminierte Minderheit ghört hed, isch er ned id Armee ufgno worde. Drum hed er imene Restaurant gschaffed und Judo trainiert, bis er eines Tages Schüeler bim Karate-Training beobachtet hed.

De jung Oyama ich fasziniert gsi vo dere Kampfsportart und hed sofort s Dojo, das isch der Üebigsruum, vom Gichin Funakoshi ufgsuecht. Det hed er agfange de Karate-Stil Shotokan z praktiziere. Schnell hed er Fortschritt gmacht und es isch ned lang gange, bis er scho d Prüefig zum 1. Dan (Shodan) als Schwarzgurt abgleid hed. Doch de Oyama isch ned zfride gsi mit em Shotokan Karate. Er hed anderi Vorstellige vom Kampf gha als sin Meister. Er hed agfange si eignig Karate-Stil z entwickle. De Kyokushin-Stil isch somit ufgrund vo sinere sehr grosse Vorbildig i verschidenste Kampfsportarte entstande. 1951 hed de Oyama in Tokio sis erste Dojo eröffnet um si Stil ad Öffendlichkeit z bringe. Sini Organisation Kyokushin Kaikan isch mit de Jahre sehr erfolgrich und gross worde.

De Oyama isch mit 71 Jahre gstorbe. Er hed inzwüsche de höchst möglich Meistergrad vom 10. Dan erreicht. Er hed de Akiyoshi Matsui als Verantwortliche vo sinere Organisation zrugglah. Doch das hed zu politische und wirtschaftliche Problem i de bis dahi meh oder weniger einheitliche Kyokushin Kaikan-Welt gfüert und es isch zunere Zerstplitterig cho. Unter anderem hed am Oyama si Schüler Steve Arneil de Weltverband IFK (International Federation of Karate) gründet, eini vo de wältwit grösste Kyokushin-Karate Organisatione. Si isch au hüt i de Schwiiz starch verträte. In Dütschland hend sich s KKD (Kyokushinkai Karate Deutschland) und s DKO (Deutsche Kyokushin Organisation) etabliert.

Training[ändere | Quälltäxt bearbeite]

S Training vom Kyokushin Karate bestaht wie bi de meiste Karate-Stil us Kihon, Kata und Kumite.

  • Im Kihon, also i de Grundschuel, lernt en Karateka alli 145 genau vorgschribnige Technike vom Kyokushin-Karate. Durch vielfachi Wiederholige wärdid die Bewegigsabläuf perfektioniert. Erst wenn de Schüler s Kihon beherrscht, wändet er sich de Wettkampfdiszipline wie Kata und Kumite zue.
  • Kata isch d Wiiterfüerig vom Kihon. Sie bereitet ufs Kumite vor. En Kata isch verglichbar mit "Kür" im Iiskunstlauf. De Karateka lernt en genau festgleiti Abfolg vo Einzeltechnike, Richtigsänderige und Schritt. Kata isch im Kyokushin-Karate en Wettkampfdisziplin.
  • Kyokushin wird ned z letst wäg em Kämpfe oft als hertischte Karate-Stil bezeichnet. Kämpft wird im Vollkontakt. Es wird mit de Füscht uf bei und Oberkörper gschlage. Mit de Bei wird zuesätzlich au no uf de Chopf gschlage. S Ziil isch in möglichst churzer Ziit en KO-Schlag oder en sichtbari Träfferwirkig z erziile. S System isch uf churzi Kämpf usgleit, wo defür sehr intensiv und hart sind.

Zuesätzlich wird in Kyokushin-Dojos au vill Abhertige und Bruchtests Betribe. S Training gilt als eis vo de hertischte wos git. Grad das harte Training isch verantwortlich defür, dass Kyokushin Kämpfer sehr zäh sind. Einigi Kämpfer wie zum Bispil de Schwiizer Andi Hug hends gschaft mit em Kyokushin-Karate berüehmt z wärde, sogar im K1.

Gurtsystem[ändere | Quälltäxt bearbeite]

S Gurtsystem isch starch vo de verschidene Organisatione abhängig. Meistens gsehts so us:

  • 10. Kyu – Wyss
  • 9. Kyu – Rot
  • 8. und 7 Kyu – Blau
  • 6. und 5. Kyu – Gälb
  • 4. und 3. Kyu – Grün
  • 2. und 1. Kyu – Bruun
  • 1. bis 10. Dan – Schwarz

Bim Schwarze Gurt isch pro Dan-Grad ei goldnige Streife uf de Gurt gstickt.