Konstantin II. (Gegepapscht)

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Dr Konstantin II. (* Nepi, Latium; † no 769 im Chloschter Cella Nova) isch as Laie dur sy Brueder, dr Herzog Toto vu Nepi, churz noch em Dod vum Paul I. gwaltsam, wahrschyns am 5. Juli 767, as Papscht yygsetzt wore.

Lääbe un Wirke[ändere | Quälltäxt bearbeite]

Dr Konstantin II. wird as Gegepapscht (pseudopapa, antipapa) gfiert, drotz ass des in sym Fall aigetli nit zuedrifft: Gegepapscht wird gnännt, wär zue Läbzyte vun eme scho kanonisch gwehlte un nit zruggdrättene Papscht ufgstellt woren isch. Wu dr Konstantin zum Papscht glupft woren isch, isch dr Amtsvorgänger Paul I. aber scho gstorbe gsii, dr Hailig Stuel dodermit nit bsetzt gsii. Bim Philipp, wu anne 768 vu dr Langobarde as Gegepapscht – zum Konstantin II. – yygsetzt woren isch, drifft des zue.

Dr Primicerius Christophorus, Aafierer vu dr frankefryndlige Bartei z Rom un vu dr Opposition geg dr Konstantin II., het dää mit langobardischer Hilf Mitti 768 feschtsetze loo. Dr Gegepapscht Philipp, wu vu ihm ufgstellt woren isch, het si aber nume churz im Amt chenne halte, schon o ne baar Däg isch er vu dr Aahänger vum Konstantin verdribe wore. In ere vum Christophorus fir dr 1. Augschte 768 organisierte kanonische Wahl, wu au großi Dail vu dr remische Burgerschaft mitgmacht het, isch dr Chilchebeamte Stephan, wu scho unter em Stephan II. un em Paul I. hochi Peschte ghaa het, zum neie Papscht gwehlt wore.

In dr Däg druf sin dr Konstantin II. un syni Gfolgslyt vu dr Aahänger vum Stephan verfolgt un zum Dail schwär misshandlet wore, dr Konstantin sälber isch mit schwäre Gwichte behange, uf eme Ross dur d Stadt dribe un derno im Chloschter San Saba inhaftiert wore. Am 6. Augschte isch er offiziäll us sym Amt dribe wore. Wu s unter syne Aahänger zue re Revolte geg dr Stephan III. chuu isch, isch dr Konstantin bländet un in d Stroße vu Rom gheit wore, wun em nieme het derfe z Hilf chuu. Am Dag druf isch er wider im Chloschter inhaftiert wore.

Am 12. April 769 het dr Stephan e vor allem vu fränkische Bischef bsuecht Laterankonzil ufgmacht, wu s unter anderem um di us ire Sicht uurächtmäßig Ernännig vum Konstantin zum Papscht gangen isch. Konstantin het aagee, är sei gege sy Wille zum Papscht glupft wore, s heb aber eber brucht go d Brobläm lese, wu dur dr Dod vum Paul I. ufdrätte sin. Am negschte Dag het er aber sy Gständnis widerruefe, wel d Vorgäng bi vorige Papschtwahle us syre Sicht nit vyl andersch gsii seie. Doderby het er si nametlig uf syni Vorgänger Sergius I. un Stephan II. beruefe, wu wie är vu dr Synod hätte mieße as Laie aagluegt wäre. Vu däre Argumentation wietig, het s Konzil nit nume d Absetzig vum Konstantin bstetigt un ihn exkommuniziert, mer het au aagornet, ass ihm d Zunge uusegrisse wird. Syni Ufzaichnige un Erloss sin vor dr versammlete Synod verbrännt wore. Dernoi isch dr Konstantin wider ins Chloschter gsteckt wore, ab do waiß mer nyt me vun em.

Literatur[ändere | Quälltäxt bearbeite]

  • Ottorino Bertolini: Costantino II. In: Alberto M. Ghisalberti (Hrsg.): Dizionario Biografico degli Italiani (DBI). Band 30 (Cosattini–Crispolto), Istituto della Enciclopedia Italiana, Rom 1984, S. 314–320 (italienisch).
  • Costantino, antipapa. In: Massimo Bray (Hrsg.): Enciclopedia dei Papi. Band 1: Pietro, santo. Anastasio bibliotecario, antipapa. Istituto della Enciclopedia Italiana, Rom 2000, S. 670–675
  • Konstantin II. Papst (767). In: Biographisch-Bibliographisches Kirchenlexikon (BBKL). Band 4, Herzberg 1992, ISBN 3-88309-038-7, Sp. 460.
Information icon.svg Dä Artikel basiert uff ere fräie Übersetzig vu dere Version vum Artikel „Konstantin_II._(Gegenpapst)“ vu de dütsche Wikipedia. E Liste vu de Autore un Versione isch do z finde.