Chloster Liide Christi

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Jakobsbad mit em Chloster Liide Christi

S Chloster Liide Christi isch e Kapuzinnerinechloster z Jakobsbad bi Gonte.

Gschicht[ändere | Quälltäxt bearbeite]

Dor e Novizin us em Chloster Wonnestee bi Tüüfe isch 1851 zwösche Gonte ond Urnäsch da Frouechloster grönded worde. Fööf Johr spööter isch Grönderi gstorbe ond di gäästlich Läätig vom Mueterchloster Wonnestee öbernoo worde. Sed 1918 ischt s Chloster sölbstendig. Bis 1866 häts zom Bistum Chur ghört ond sed do hät de Bischof vo Sangalle s Visitazionsrecht.

Konvent[ändere | Quälltäxt bearbeite]

S Chloster Liide Christi isch em Terziarinneorde noch em Franz vo Assisi aagschlosse. S Patrozinium fiirids im Chloster am Fest vo de Schmerzensmueter Maria. D Chlosterfroue görtid si mit eme rote Strick as Zääche för d Verehrig vom Chostbare Bluet Christi.

Konventsentwicklig
Johr 1930 1994 2001 2006 2013 2015
Schwöstere 46 15 13 11 8 7

Am Stiftigsfäscht vom 18. Augste 2013 sends 8 Schwöstere ond zwää Novizinne gsee.[1]

Zytlichi Profäss[ändere | Quälltäxt bearbeite]

Am Saamstig, 26. Abröll 2014, hönd d Maria Elisabeth Pustelnik (22) und d Maria Chiara Eicher (43) de wyss Schleier vo de Novizinne gäge de schwaaz vo de Schwöstere iituusched. Im Festgottesdienst hönd die beede ehemolige Novizinne eres Profässvespräche abglääd, vor de Frau Muetter, de Schwöster Mirjam, ond vor de vesammlete Gmeend. För die beede Kapuzinerinne chommid jetzt dröi witeri Johr bis zur ewige Profäss, e Zyt zomm eri Entschaidig fös Chlooste z öbeprüefe.[2]

Chlosterlade[ändere | Quälltäxt bearbeite]

Sed 1916 stöllid d Chlosterfroue us Chrüüter, wos zom Tääl im äägne Garte aapflanzid, veschidnigi Häälmittel här. Im Chlosterlade, wo sed a paar Johr ime renovierte Näbegeböi ischt, werdid dia Medikament nebet anderne Produkt verchauft. E Spezialität isch de Chlosterliggör Angelika.

Weblink[ändere | Quälltäxt bearbeite]

 Commons: Chloster Liide Christi – Sammlig vo Multimediadateie

Fuessnoote[ändere | Quälltäxt bearbeite]

  1. Portrait des Klosters und der Schwestern uf de Website vom Chloster abgruefe am 19. Augste 2013
  2. Freudentag für Kloster Leiden Christi Archivlink (Memento vom 4. März 2016 im Internet Archive) appenzell24.ch Artikl vom 27. Abröll 2014